DILI, 22 fevereiru 2024 (TATOLI)—Membru Parlamentu Nasionál (PN) liuhosi Deputada PD, Sanha Tilman, sujere ba Sekretária Estadu Floresta (SEF) atu kontinua implementa programa reflorestasaun hahú hosi baze to’o nasionál.
Membru PN ne’e apresia ho Sekretáriu Estadu Floresta ho ekipa tomak ne’ebé ho serbisu kontinuasaun iha fulan janeiru tinan ne’e halo atividade kuidadu aí-horis hodi subtitui fali rai mamuk sira-ne’ebé iha liuliu iha foho parte Tasi-Tolu nian, hodi nune’e foho iha área ne’eba nia paizajen komesa matak fila-fali ona.
“Nune’e, nafatin sujere ba Sekretáriu Estadu Floresta ho nia ekipa tomak iha tempu udan ne’e aproveita atu bele kontinua implementa programa reflorestál hahú hosi baze mai to’o nasionál,” Deputada Sanha Tilman hateten iha uma fukun Parlamentu Nasionál.
Nia hateten, liuliu identifika área sira-ne’ebé sei mamuk hela ka aí-horis laiha hanesan iha área tasi ibun no foho lolon sira, atu nune’e bele prevene rai halai, redús temperatura manas no bele prevene bee-matan sira labele maran hodi nune’e bele redús mudansa klimátika.
Antes ne’e, Deputada FRETILIN, Maria Angélica Rangel, preokupa populasaun sira kontinua sunu rai iha foho lolon sira, hanoin ida-ne’e impaktu tebes ba ambiente hanesan Timor-Leste hasoru iha tempu bailoron naruk, bee-matan sira maran, rai manas makaas no impaktu sira seluk tan, nune’e husu Governu atu kontrola ida-ne’e.
Nune’e, nai dehan, populasaun sira presiza iha konsiénsia hodi kontribui ba ambiente atu labele sunu rai arbiru.
Jornalista : Nelson de Sousa
Editór : Cancio Ximenes
