DILI, 22 fevereiru 2024 (TATOLI) – Primeiru Ministru, Xanana Gusmão, husu ba professór kontratadu sira ne’ebé kontratu ramata ona iha 31 dezembru 2024, atu kontinua hakru’uk ba regra hodibele konkorre fali bolsa rekrutamentu hosi Ministériu Edukasaun.
“Ha’u husu ba profesór ka manorin na’in sira atu ba iha Ministériu Edukasaun hodi hatene sira nia problema no karik Ministériu Edukasaun presiza profesór karik bele haree tuir regra atubele sai manorin na’in,” Primeiru-Ministru hatete ba jornalista sira iha Palásiu Prezidensiál Dili, kinta ne’e.
Notísia relevante: Vaga ba bolsa rekrutamentu ba profesór sira fó sai iha fevereiru
Tuir Xefe Governu katak problema profesór kontratadu ne’e akontese tanba antes hatama profesór sira la tuir regra Funsaun Públika. Ho nune’e Ministériu Edukasaun haree hela oinsa atu rezolve maibé tuir regra.
“Profesór-sira nia problema mak ita hotu tenke tuir regra, se ita la tuir regra Governu ne’e bele to’o iha ne’ebé de’it sei infrenta problema hanesan ne’e no problema ne’ebé profesór-sira hasoru tanba Governu antes ne’e halo rekrutamentu la tuir regra, entaun ami haree hela atu rezolve loke fali konkursu profesór sira bele ba aplika nune’e liu bele ba hanorin fali,”sujere Xefe Governu.
Tanba ne’e, nia husu ba professor kontratadu ne’ebé nia kontratu ramata no halo asaun pasifiku iha Ministériu Edukasaun atu kalma no pasiénsia hein prosesu tanba Ministériu sei loke konkursu bolsa.
Ho situasaun sira ne’e, Primeiru Ministru ne’e dehan tan katak ba membru Governu ne’ebé la hala’o servisu ho di’ak no tuir regra iha marsu no abríl sei simu konsekuénsia.
“Marsu-abríl ha’u sei la’o ba Munisípiu haree iha Ministériu balun ne’ebé la kumpre nia programa sei hasai Governante ne’e, tanba nia la serve atu ukun, tanba mai atu serbí la’ós mai atu hetan previléju no la’o ho karreta Estadu no iha tan seguransa,” líder Ezekutivu ne’e afirma.
Notísia relevante: Tinan ne’e, ME foku ba kualidade no kontinuidade prosesu ensinu no aprendizajen
Rekorda fali katak, mekanizmu ba konkursu ne’e regula tuir diploma ministeriál, tanba ne’e ME sei serbisu hamutuk ho Komisaun Funsaun Públika (KFP) hodi halo prosesu ba vaga ne’e bainhra teste ne’e la’o ona bele iha duni transparánsia.
Bolsa ne’e, Ministériu Edukasaun anunsia ona iha fevereiru ho ninia lala’ok regula ona iha diploma ministeriál númeru 82/2023, 22 dezembru, ne’ebé ko’alia kona-ba regulamentu ba rekrutamentu karreira dosente. Diploma ne’e sei orienta ekipa téknika sira atu halo prosesu ba rekrutamentu ne’e.
Prosesu administrativu hotu iha janeiru ne’e tama ona iha esforsu hotu, nune’e manorin sira ne’ebé maka atu aprezenta nia kandidatura ne’e tenke prienxe duni rekezitu hodi bele fó vantajen ba sira atubele kompete hodi hetan oportunidade ba vaga refere.
Notísia relevante: Aplikante 8.601 konkorre bolsa rekrutamentu ba profesór
Jornalista: Hortencio Sanchez
Editór : Florencio Miranda Ximenes
