Progresu konstrusaun UNP 16 iha suku Builale atinje 100%
VIQUEQUE, 22 fevereiru 2024 (TATOLI)-Enjiñeiru Programa Nasionál Dezenvolvimentu Suku (PNDS), António da Silva, informa progresu konstrusaun Uma Naroman ba Povu (UNP) unidade 16 iha suku Builale, postu administrativu Ossu, munisípiu Viqueque atinje ona 100%.
“Uma hirak ne’e atinje ona 100% no ami hamutuk ho autoridade lokál entrega ona ba benifísiáriu sira hodi hela ba laran”, António da Silva, hatete ba Agência TATOLI,I.P iha resintu munisípiu Viqueque, ohin.
Projetu konstrusaun UNP sira-ne’e enjeñeiru PNDS halo sertifikasaun no halo enkontru finál hamutuk ho autoridade lokál sira hafoin entrega uma ba benifísiariu sira uza.
“Maske ami entrega ona uma UNP ba ita-nia benifísiariu sira, maibé ami haree osan restu ba konstrusaun uma 16 nian suku Builale ne’e sei iha $6.000 no tuir planu sei sosa sasán uma laran nian hodi entrega tán ba ita-nia benifísiáriu sira”, nia hato’o.
Enkuantu, konstrusaun ba UNP +A kada uma ida ho medida 6m x 7m gasta $13.000, no UNP regulár kada uma ida 7m x 8,6 m inklui dapur kada uma ida gasta $17.000. Nune’e UNP konstrui iha suku Builale UNP plus A unidade 7 no UNP regulár totál uma 9.
Entretantu suku Builale iha aldeia totál hamutuk lima kompostu husi aldeia Liaro, Henuhuta, Cairau, Tulaoli no Beicai ona.
Notísia relevante: Progresu fíziku UNP unidade 356 iha Viqueque atinje 69,55%
Jornalista : Vitorino Lopes da Costa
Editór : Florencio Miranda Ximenes
