DILI, 22 fevereiru 2024 (TATOLI)—Reprezentante povu iha Parlamentu Nasionál (PN) liuhosi Deputadu FRETILIN, Antonio Moniz Calau, apoia programa Sekretária Estadu Asuntu Toponímia Organizasaun Urbana (SETAOU) ne’ebé muda negosiante sira faan obralan iha Ai-mutin ba merkadu Manleuana, maibé husu atu kria kondisaun ba negosiante sira.
Notísia Relevante: SEATOU sobu baraka negosiante iha Ai-mutin no muda bá Merkadu Manleuana
“Apoiu programa ne’ebé mak SEATOU halo, tanba ne’e bazea ba lei. Atividade faan roupa segunda mão (obralan) ne’e perturba duni no dalaruma sira faan iha valeta nia leten, ida ne’e viola lei. Agora kestaun mak ne’e, ita atu muda ita-nia vendedór sira primeiru mak kria kondisaun ba sira,” Deputadu Calau hateten ba jornalista sira iha PN, kinta ne’e.
Tuir observasaun iha terenu, nia dehan, agora merkadu Manleuana nia kondisaun volume atu simu vendedór sira ne’e laiha fatin atu halo négosiu, tanba ne’e mak presiza kria kondisaun atu nune’e vendedór obralan sira kontinua buka sira-nia moris.
Deputadu CNRT, Patrocínio Fernandes, konsidera programa SEATOU nian ne’e hadi’a sidade no tanba ohin loron iha tempu udan sai problema boot ne’e inundasaun akontese iha Dili tanba soe lixu arbiru, konstrui uma iha valeta leten no faan sasán iha trotoar leten.
Nune’e, nia dehan, nu’udar sidadaun ne’e ema hotu sente pertense ba Estadu ne’e preokupasaun ne’ebé Estadu iha ne’ebé sidadaun hotu presiza kontribui.
“Muda sira ba merkadu ne’ebé Governu prepara Manleuana. Se Manleuana labele akomoda hotu, hau fiar kata, Governu tenke aranja fatin atu oferese ba sira hodi fila ba sira,” nia hateten
Deputada CNRT, Aliança da Conceição, husu SEATOU atu haree loza sira iha kapitál Dili ne’ebé konstrui iha valeta no trotoar leten.
Jornalista : Nelson de Sousa
Editór : Cancio Ximenes
