DILI, 22 fevereiru 2024 (TATOLI)—Sekretaria Estadu Komunikasaun Sosiál (SEKOMS) no Organizasaun Naun Governamentál, Fundasaun Mahein (MF) diskute hela hodi estabelese kooperasaun serbisu ida hodi kapasita jornalista sira iha área defeza no seguransa.
“Diretór Fundasaun Mahein hasoru ha’u posibilidade serbisu hamutuk iha kapasitasaun ba jornalista sira atu inteira di’ak liután matéria sira ne’ebé iha seguransa no defeza tanba Fundasaun Mahein durante ne’e barak liu fó advokasia ba iha defeza no seguransa,” Sekretáriu Estadu Komunikasaun Sosiál, Expedito Dias Ximenes, relata hafoin ramata hala’o reuniaun ho Diretór FM, Nelson Belo, iha gabinete SEKOMS, Palásiu Governu kinta ne’e.
Governante ne’e esplika katak tuir prinsípiu jerál iha jornalizmu nian ne’e iha polítika editoriál, mídia ida-idak ne’e bolu ‘desk’ katak kada mídia destaka jornalista kada desk, hanesan desk defeza no seguransa ou desk ekonomia, polítika no sosiál.
Notísia relevante : SEKOMS kapasita jornalista rádiu komunidade ba empoderamentu komunidade
Fundasaun Mahein durante ne’e halo advokasia ba setór defeza no seguransa, nune’e sira observa katak dala barak mídia nia kobertura ba asuntu relevante jerál de’it, tuir loloos tenke halo desk ketak-ketak, katak jornalista ida kobertura iha área polítika ka defeza no seguransa tenke foku ba ida-ne’e de’it, nune’e jornalista ne’ebé kobertura bele inteira didi’ak asuntu ka matéria sira molok kobertura no elabora sai notísia.
“Bainhira jornalista sira halo kobertura jerál de’it katak bele ba kobertura iha área ekonomia depois ba fali polítika, ida-ne’e bele konsidera ladún foku. Ho hanoin ida-ne’e maka iha IX Governu liuhosi SEKOMS ho orientasaun Primeiru-Ministru, Xanana Gusmão nian jornalista sira presiza dezenvolve ona formasaun ida ho karater investigativu, katak halo notísia karik tenke kle’an, ida-ne’e tenke domina matéria,” Antigu jornalista akresenta.
Molok implementa planu ne’e, SEKOMS no FM sei halibur dirijente mídia sira hodi diskute kle’an liután ein termu tékniku nian.
Iha biban hanesan, Diretór FM, Nelson Belo, konsidera presiza tebes iha kapasitasaun jornalizmu iha asuntu defeza no seguransa, nune’e bele ajuda jornalista timor-oan sira bele fó sai notísia ba públiku no labele hamosu polémika ka kria konfuzaun.
“Atu dehan katak asuntu seguransa no defeza sensitivu tebes, entaun oinsá maka Fundasaun Mahein ho SEKOMS serbisu hamutuk atubele kapasita no fahe informasaun ba jornalista sira bainhira halo kobertura ba asuntu refere, nune’e jornalista sira ne’ebé iha duni badaen ba área refere. Ne’ebé SEKOMS disponível hakarak implementa planu ne’e,” nia tenik.
Tuir FM nia observasaun katak presiza duni iha formasaun ba jornalista sira ligadu ho asuntu defeza no seguransa, nune’e molok halo kobertura bele kria pergunta ne’ebé di’ak no labele bazeia de’it ba isu-isu bosok sira, maibe tenke mai ho informasaun ho prova bazeia ba lei no realidade seguransa rai-laran.
“Báziku hosi asuntu defeza no seguransa tenke domina uluk baze legál sira molok atu kobertura no elabora informasaun ida sai ba notísia,” nia sujere.
Jornalista : Antónia Gusmão
Editora : Julia Chatarina
