DILI, 23 fevereiru 2924 (TATOLI) – Sentru Pekuáriu Dotik, iha Manufahi, daudaun halo produsaun ba balada sira hanesan karau vaka, fahi, bibi, manu Timór, manu rade no seluk tan. Atu asegura animál sira ne’e maka Ministériu Agrikultura, Pekuária, Peska no Floresta (MAPPF) disponibiliza rihun $200-resin hodi konstrui muru protesaun iha fatin ne’e.
Xefe Sentru Dezenvolvimentu Demostrasaun no Treinamentu Pekuária Dotik, Almério Marques, dehan sentru ne’e hetan apoiu finanseiru tanba balada sira ne’ebé haki’ak iha sentru ne’e nia númeru komesa aumenta, tanba ne’e presiza muru protesaun.
Verba ne’ebé Governu apoia ne’e atu konstrui de’it muru tanba sentru ne’e ninia área luan, tan ne’e presiza hetan apoiu osan hodi dezenvolve sentru pekuáriu dotik ne’e atu iha fatin seguru hodi bele trata animál sira ne’ebé maka haki’ak ho di’ak.
Maske Governu disponibiliza ona osan ba sentru ne’e, maibé konstrusaun seidauk hala’o tanba presiza liuhusi prosesu aprovizionamentu hodi loke konkursu públiku atu empreza sira bele hatama sira-nian dokumentu, tanba ne’e ninia prosesu sei han tempu.
Animál sira ne’ebé maka Sentru Dotik prodús ona hamutuk 321 mak hanesan karau vaka 81 karau mutin (braman) ida, bibi 33, fahi makau 81, manu lokál 37, manu mareko 80, manu rade 10 no bibi etau (bibi susu-been) 31.
Aleinde ne’e, Governu mós apoia osan operasionál ba sentru tolu inklui sentru Dotik-Manufahi, Pato-Lautém no Raitau-Viqueque hamutuk rihun $80-resin, nune’e bele asegura kondisaun animál sira ne’ebé maka haki’ak iha ne’ebá.
“Hanesan iha Dotik daudaun kuda ai-han ba animál sira iha rai ektare neen mak hanesan ai-gamal, ai-kafe no ai-taramba”, Almério Marques hatete iha Comoro, ohin.
Iha Sentru Dotik iha ekipa téknika hamutuk ema na’in-ualu mak apoia hela serbisu iha área refere. Ekipa traballu sira ne’e serbisu kle’ur ona iha setór pekuáriu, entaun sira ne’e kuaze iha esperiénsia barak oinsá atu kuidadu animál sira hodi fó produsaun di’ak.
Jornalista: Tomé Amado
Editora: Maria Auxiliadora
