BOBONARO, 26 fevereiru 2024 (TATOLI) – Sentru Atendimentu Agrikultura Kuda Ulun Bobonaro (CAAKUB, sigla portugés) planu iha tinan 2024 sei sosa hare-kulit ho kuantidade hosi tonelada 150 to’o 200 ne’ebé agrikultór sira prodús iha époka dahuluk tinan ne’e.
Prezidente CAAKUB, António da Barreto da Conceição, hateten hare-kulit hirak ne’e sei sosa ho folin kada kilograma sentavu $0,40.
Notísia relevante: CAAKUB sei distribui foos tonelada 50 ba Sentru Lojístika Nasionál
“Ami iha planu atu sosa tonelada 150 ba to’o 200, ami-nia planu ne’e ami la’o kedas iha tinan kotuk to’o agora ami la muda,” nia ko’alia iha Soso, Maliana, segunda ne’e
António subliña, produtu ne’e sei sosa hosi grupu 28 ho totál agrikultór 300-resin, ne’ebé hamahan-aan iha asosiasaun ne’e maibé la taka dalan mós ba agrikultór sira seluk ne’ebé hakarak atu fa’an hare.
“Ita-nia membru sira-nia hare lato’o, entaun ita bele sosa iha agrikultór sira seluk, tanba tinan kotuk ami hakarak sosa tonelada 150 to’o 200, maibé lato’o ami sosa de’it tonelada 65, 142, ita espera tinan ne’e karik produsaun ne’e sa’e di’ak, ita prontu atu sosa hotu, tanba preparasaun finansa prontu hotu ona,” nia katak.
Durante ne’e agrikultór ne’ebé hamahan-aan iha CAAKUB mai hosi suku sira-ne’ebé pertense iha postu administrativu Maliana hanesan Ritabou, Raifun, Odomau, Lahomea no Holsa.
Enkuantu hare-kulit hirak-ne’e hafoin halo prosesamentu sei fa’an ba konsumidór sira iha Maliana no loja sira iha kapitál Dili.
Notísia relevante: António Barreto lidera CAAKUB periúdu 2021-2023
Jornalista: Sérgio da Cruz
Editór: Evaristo Soares Martins
