Deputadu CNRT husu MJ renova estudante timoroan iha Indonézia nia pasaporte
DILI, 26 fevereiru 2024 (TATOLI)—Deputadu CNRT iha Parlamentu Nasionál (PN), Luis Ximenes Caldeira, husu Ministériu Justisa (MJ) liuhusi diresaun serbisu rejistu notariadu atu halo atendimentu renova estudante timoroan iha Indónezia sira-nia pasaporte.
Deputadu CNRT ne’e apresia ba serbisu ezekutivu nian ne’ebé tau ona mákina atendimentu ba halo pasaporte, billete identidade (BI) iha nasaun Reinu Unidu no Irlandia.
“Pedidu estudante iha Indonézia ho Austrália tau mós mákina, nune’e bele tulun maluk estudante sira-ne’e, tanba sira mós hasoru problema iha dokumentu sira-ne’e. Tanba, sira mós labele abandona sira-nia estudu no balun falta loron tolu de’it drop out (DO) ona. Nune’e sira hato’o mensajen mai, hodi bele atende sira-nia problema visa ho pasaporte no BI ne’e,” nia levanta liuhusi reuniaun plenária PN, segunda ne’e.
Reprezentante povu ne’e husu parte ezekutivu atu tau atensaun ba kestaun ne’e hodi fó atendimentu ba sidadaun timoroan sira iha rai-li’ur.
Deputadu FRETILIN, Helena Martins, preokupa ho traballadór timoroan sira-ne’ebé ba buka serbisu iha Inglaterra ho Irlandia tanba nesesidade uma laran maibé to’o balun mate atu lori fila sira-nia mate-isin mai Timor-Leste presiza lori tempu naruk to’o fulan rua, tanba kustu selu ne’e boot, nune’e husu ezekutivu liuhosi entidade relevante atu haree fó mós konsiderasaun oinsá fasilita lori fila.
Vise Ministru ba asuntu Parlamentár, Adérito Hugo da Costa, hateten situasaun mákina emprime pasaporte loos duni iha mákina tolu de’it mak halo atendimentu ba territóriu tomak durante tinan hira ikus ne’e, no Governu deteta desde entrada iha jullu tinan 2023 pontu situasaun ne’e no agora halo akizisaun ba mákina foun atu halo atendimentu rápidu ba ita-nia populasaun.
Nia dehan, kona-ba prezensa iha li’ur hanesan Portugál, Inglaterra, Irlandia, Korea do Súl, Austrália agora iha programa hein ezekuta atu destaka tékniku sira husi Ministériu Justisa ba halo atendimentu ba sidadaun sira ne’ebé pasaporte kaduka.
Enkuantu, antes ne’e mós Deputadu sira iha PN levanta ona preokupasaun hodi husu parte ezekutivu liuhosi ministériu relevante atu halo atendimentu ba estudante timoroan ne’ebé pasaporte kaduka iha Portugál inklui sidadaun timoroan iha Inglaterra no Irlandia.
Jornalista : Nelson de Sousa
Editór : Cancio Ximenes
