iklan

COVALIMA, HEADLINE

Konsellu Kombatente Covalima husu ba veteranu no família mártir atu foti uniforme

Konsellu Kombatente Covalima husu ba veteranu no família mártir atu foti uniforme

Prezidente Konsellu Veteranu Covalima, Osório Soares 'Mausoko'. imajen Tatoli/ Celestina Teles.

COVALIMA, 26 fevereiru 2024 (TATOLI)  Prezidente Konsellu Munisipál Kombatente Libertasaun Nasionál (CMCLN-sigla portugés) Covalima, Osório Soares ‘Mausoko’, husu ba veteranu no família mártir hamutuk 125 atu foti uniforme ne’ebé mak daudaun disponivel ona iha edifísiu. 

Osório Soares salienta katak molok atu suku no sukat uniforme, veteranu sira tenke kontribui osan kada ema $155. Osan ne’e hatama fazeadamente katak dahuluk entrega $80, depois farda to’o iha Timor-Leste mak fó tan osan $75.

“Agora, ita-nian veteranu no [família] mártir barak seidauk foti sira-nian uniforme ne’ebé iha edifísiu, tanba sira seidauk iha osan $75 nomós uniforme balun mós seidauk mai husi Indonézia”, Osório Soares hatete iha Tabakolot, ohin.

Uniforme veteranu ho folin $155 ne’e tanba empreza suku ho pakote hanesan kalsa, kamiza, kazaku, gravata no xapeo ne’ebé ba veteranu sira kór-mutin malahuk no ba mártir sira kór-mean.

Nia realsa katak farda balun mak to’o ona iha 2023 no husi Konsellu Veteranu mós hato’o kedas informasaun, maibé to’o ohin loron seidauk foti, tanba ne’e nafatin apela ba veteranu sira atu foti sira-nian uniforme.

Tuir dadus CMCLN Covalima, rejista veteranu no mártir husi postu pdministrativu Fatululik, Fatumea, Fohorem, Tilomar, Maucatar Suai no Zumalai hamutuk 2000-resin no husi númeru na’in-75 maka foti ona no seluk seidauk tanba sei falta iha orsamentu no balun sei prodús iha Indoezia ne’ebé seidauk to’o mai.

Veterana Verónica de Jesus, admite katak nia seidauk foti uniforme iha edifísiu Konsellu Veteranu, tanba  la rona informasaun nomós dadaun seidauk iha osan atu foti.

“Ami suku uniforme bazeia ba informasaun husi Konsellu Veteranu Covalima, ne’ebé ami sukat [farda] atu suku farda iha 2022, maibé to’o agora seidauk foti tanba seidauk iha osan $ 75 ”, dehan.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!