VIQUEQUE, 27 fevereiru 2024 (TATOLI)- Diretór Servisu Edukasaun Munisípiu Viqueque, Domingos Brandão, informa, estudante na’in-19.000 munisípiu Viqueque simu tipu ai-moruk Albenazol hodi kombate no prevene lumbriga.
“Foin lalais ne’e ekipa husi Organizasaun Saúde Mundiál hasoru ona ha’u hodi husu dadús estudante idade 5 mai karik, atu simu ai-moruk Albenazol atu kombate lumbriga nian. Nune’e dadús jerál estudante husi ensinu báziku iha munisípiu Viqueque ha’u entrega ona dadús hamutuk 19.000”, Domingos Brandão, hateten ba Agência Tatoli, ohin.
Domingos hatutan, albenazol ba estudante husi siklu 1,2 ne’ebé idade 5 mai kraik sei partisipa hotu ba programa distribuisaun ai-moruk atu kombate lumbringa,nune’e servisu edukasaun aviza responsavél eskola hodi orienta estudante sira partisipa programa vasinasaun ne’e.
“Distribuisaun ai-moruk lumbriga ne’e sei implementa iha tempu badak. Nune’e ha’u husu ba koordenadór no diretór eskola sira bainhira ekipa saúde sira to’o ona iha ita boot sira-nia eskola tenke koopera ho sira hodi fó ai-moruk ba ita-nia estudante sira”, nia afirma.
Iha fatin ketak, Diretór Servisu Saúde munisípiu Viqueque, Pedro da Silva Fereira, haktuir kona-bá distribuisaun ai-moruk Albenazol ba estudante siklu 1,2 ho idade lima mai karik ho objetivu atu kombate lumbriga no programa ida-ne’e sei implementa iha juñu 2024.
“Alende ne’e, tempu badak mós sei fó vasina kankru servikál ba ita-nia estudante feto sira husi idade 11, maibé ida-ne’e ita seidauk implementa tanba agora ekipa sira sei rekolla dadús. Maske dadús jerál servisu edukasaun distribui ona, maibé presiza halo identifikasaun fila idade no sexu feto sira hafoin implementa vasina ba ita-nia estudante feto husi idade 11 seidauk”. nia subiliña.
Notisía relevante: Outubru, MS hala’o kampaña nasionál ba vasina sarmpu no rubéola
Jornalista : Vitorino Lopes da Costa
Editór : Florencio Miranda Ximenes
