DILI, 27 fevereiru 2024 (TATOLI) –Enkaregadu Negósiu Embaixada Estadu Unidu Amérika (EUA) iha Timor-Leste, Marc Weinstock, kongratula Timor-Leste ne’ebé mak adere ona ba Organizasaun Mundiál Komérsiu (OMK).
“Estadu Unidu ho ksolok hatoo parabéns ba Timor-Leste ba nasaun ne’e ninia adezaun ba Organizasaun Mundiál Komérsiu (OMK). Estadu Unidu apresia persisténsia Timor-Leste nian no rekoñese susesu boot sira ne’ebé halo ona atu kompleta rekerimentu sira no tempu ba negosiasaun ne’ebé badak – durante tinan hitu nia laran deit,” Enkaregadu ne’e tenik liu hosi nota ne’ebé Agência TATOLI asesu, tersa ne’e.
Governu Estadu Unidu apoia ho konsisténsia esforsu Governu Timor-Leste nian atu adere ba OMK iha aspetu oi-oin, inklui liu hosi atividade importante USAID nian, partikularmente USAID ninia Atividade Governasaun Komérsiu, ne’ebé ajuda Autóridade Aduaneira Timor-Leste hodi moderniza nia sistema komérsiu atu haktuir padraun internasionál sira.
Apoiu hosi USAID nian mós mak hametin transparénsia liu husi inisiativa sira hanesan Portal Komérsiu Aduaneiru.
“Estadu Unidu hatoo parabéns ba Timor-Leste nia adezaun ba OMK, marku importante ida atu nasaun ne’e sai hanesan parseiru global estratéjiku liu,” nia katak.
Alende ne’e, Diretor Interinu Misáun USAID, Mark White hatete, adezaun Timor-Leste nian ba OMK hanesan orgullu ida ba nasaun ne’e.
“Adezaun Timor-Leste nian ba OMK hanesan prova ba nasaun ne’e nia dedikasaun no perseveransa. USAID hamrik hamutuk ho Timor-Leste, apoiu nasaun ne’e nia jornada atu hetan futuru ne’ebé abertu, konektadu, no prósperu,” Mark White hatete.
Governu Estadu Unidu, liu husi USAID, sei kontinua fó asisténsia téknika no kapasitasaun ba Autóridade Aduaneira depois adezaun atu halo alterasaun ba Kódigu Aduaneiru atu kumpri OMK ninia Akordu Fasilitasaun Komérsiu no estabelese Eskritóriu Inkéritu Nasionál.
USAID mós apoiu elaborasaun lei hat ne’ebé tuir OMK ninia rekerimentu atu promove autonomia telekomunikasaun Timor-Leste ninian. Dezenvolvimentu lejizlasaun telekomunikasaun ne’e kritiku ba abilidade Timor-Leste nian atu atrai investimentu relasionadu ho TIK no mós atu aseita ekspansaun servisu ne’ebé iha ligasaun ho TIK.
Rekorda fali katak, USAID no Embaixada Estadus Unidus ba Timor-Leste kontribui ona osan hamutuk millaun $92 entre 2021 no 2025, hodi hadi’a ekonomia Timor-Leste nian no promove governasaun di’ak.
Dezde restaurasaun Independénsia Timor-Leste nian, USAID kontribui ona millaun $323 resin hodi promove dezenvolvimentu inkluzivu pasífku atu nasaun ne’e prósperu, saúdavel, no autosufisiente.
Jornalista: Hortencio Sanchez
Editór : Florencio Miranda Ximenes
