Komisaun F rekomenda MS tau atensaun ba HoREX Baucau

DILI, 27 fevereiru 2024 (TATOLI)—Prezidente komisaun F trata asuntu Saúde, Seguransa Sosiál no Igualidade Jéneru iha Parlamentu Nasionál (PN), Deputada Maria Gorumali Barreto, rekomenda pontu tolu ba Ministériu Saúde (MS) atu urjentemente tau atensaun ba iha Ospitál Rejionál Eduardo Ximenes (HorREX, siglá portugés) Baucau.
Notísia Relevante: Mákina raiu-xís iha HoREX Baucau avaria
“Ohin, hakarak rekomenda no solisita imediata ba Ministériu Saúde (MS), kestaun tolu urjente iha Ospitál Rejionál Eduardo Ximenes Horex Baucau. Primeiru kestaun kona-ba sala Ray-X ninia odamatan avaria dezde iha mandatu VIII Governu KOnstitusionál to’o mai momentu ne’e laiha manutensaun. Kestaun ne’e urjente tanba kondisaun atuál odamatan no sala Ray-X avaria,” Prezidente Komisaun F ne’e levanta liuhusi reuniaun plenária PN, tersa ne’e.
Nia husu MS atu halo intervensaun urjente ba kestaun ne’e ho forma redús transferénsia pasiente mai Ospitál Nasionál Guido Valedares (HNGV, siglá portugés) no poupansa gastu operasionál transferénsia nian.
Kestaun daruak mak armajen produtu farmáseutiku iha HoREX Baucau hasoru problema liña eletrisidade fulan rua afeta operasionlizasaun Air Conditioner (AC) no temperatura konservasaun produtu farmáseutiku, tan ne’e solisita ba Ministra Saúde rezolve situasaun ne’e ho lalais.
Kestaun datoluk, kona-ba sala unidade kuidadu intensivu (ICU) iha HoREX Baucau, tanba ba obra konstrusaun sala ICU hala’o iha 2021 no konklui iha 2022 no inaugura hosi Ministra Saúde sesante, iha sala ekipamentu médiku, instalasaun adekuadu hodi operasionalizasaun, konforme informasaun rekolla rekruta médiku ida intensivista.
Maibé, nia dehan, médiku ne’e agora serbisu iha Hospitál Nasionál Guido Valedares (HNGV, siglá portugés), tanba iha lasu familiár ho membru Governu no Deputadu, nune’e rekomenda ba Ministériu Saúde atu halo re-kolokasaun médiku intensivista iha HoREX Baucau.
Vise Ministru ba asuntu Parlamentár, Adérito Hugo da Costa, rejista preokupasaun ne’e hodi hato’o ba ministériu tutela hodi tau atensaun.
Notísia Relevante: HoREX Baucau transporta pasiente na’in-30 ba HNGV
Jornalista : Nelson de Sousa
Editór : Cancio Ximenes

