DILI, 27 fevereiru 2024 (TATOLI)—Reprezentante povu iha Parlamentu Nasionál (PN) liuhosi Deputadu CNRT, Gabriel Soares, husu Ministériu ObrasPúblika (MOP) atu tau atensaun ba estrada iha postu administrativu Laclubar, munisípiu Manatuto.
“Estrada ne’ebé liga komesa iha Simpang Lima rotunda entre Natarbora-Soibada no Laclubar, sujere ba Governu liuhusi Ministériu Obra Públika (MOP) ou IGEADE, I.P hodi toma atensaun. Tanba, iha ne’eba, iha mota ida sempre difikulta movimentu pasajeiru ka populasaun sira iha postu administrativu Laclubar. Iha tempu udan ne’e, difikulta sira-nia movimentasaun,” nia levanta liuhosi reuniaun plenária PN, tersa ne’e.
Tanba ne’e, nia husu ba ezekutivu liuliu ministériu relevante atu intervensaun imediata ho lalais no urjente
Deputadu CNRT, Luis Ximenes Caldeira, mós husu ba IX Governu Konstituisionál espesialmente ba ministériu kompetente atu solusiona preokupasaun komunidade Laclubar, relasiona ho estrada ne’ebé hetan estragu kuaze tempu naruk ona la halo normalizasaun.
Nia dehan, estrada Laclubar hahú hosi kruzamentu to’o ba Laclubar Villa no ponte Wehuru ne’ebé liga Laclubar Vila ne’ebé hetan estragu, obriga populasaun ultrapasa mota ida-ne’e ameasa populasaun nia vida bainhira iha tempu ukun.
Bainhira iha tempu udan la normaliza mak populasaun Laclubar nu’udar agrikultór maiória produs tua sabu difikulta tebes atu lori sira-nia produtu ba Manatuto no Dili atu faan hodi atende nesesidade uma laran.
Vise Ministru ba asuntu Parlamentár, Adérito Hugo da Costa, rejista preokupasaun ba kontinuasaun nesesidade reabilitasaun estrada no ponte sei enkamiña ba ministériu tutela hodi bele fó atensaun.
Jornalista : Nelson de Sousa
Editór : Cancio Ximenes
