SEFOPE envolve PDHJ no CAC iha koresaun matéria ba kandidatu traballadór Austrália

DILI, 27 fevereiru 2024 (TATOLI)–Sekretaria Estadu Formasaun Profisionál no Empregu (SEFOPE) sei envolve entidade sira hanesan Provedoria Direitu Umanu no Justisa (PDHJ, sigla portugés) no Komisaun Antí-Korrupsaun (CAC, sigla portugés) ba korresaun matéria ezame hosi kandidatu traballadór ne’ebé sei bá serbisu iha Austrália.

“Ekipa korresaun matéria ne’e mai hosi Diresaun Nasionál no munisípiu SEFOPE nian, Autoridade lokál no munisipál inklui instituisaun independente hanesan PDHJ no CAC atu nune’e garante transparente, inparsialidade no kualidade,” Diretór Jerál SEFOPE, Carlito Rosário Cabral, hateten liuhosi konferénsia imprensa, ne’ebé hala’o iha edifísiu SEFOPE, Caicoli, tersa ne’e.

Sistema korresaun sei utiliza sistema manuál, signifika ninia reposta sira iha hotu ona no haree tuir ida-ne’e mak halo korresaun, no desizaun koletiva deside katak korresaun iha edifísiu SEFOPE.

Notísia relevante : SEFOPE simu aplikante 55.436 hosi rezultadu rekrutamentu foun traballadór Austrália

Bainhira korresaun ramata, sei fó sai rezultadu hodi taka sai naran kada munisípiu, ho intensaun evita forma naruk iha resintu SEFOPE.

“Tuir dadus ne’ebé iha kandidatu hamutuk rihun 50 ne’e persentajen mane sei boot liu maibé nesesidade merkadu kompañia balun husu mak traballldór feto, ho razaun ida-ne’e mak ami anunsia vaga ne’e via online hodi sé de’it bele aplika,” nia akresenta.

Aleinde ne’e, laiha limitasaun númeru ba joven sira ne’ebé kompete, nune’e bainhira kandidatu sira priense pergunta sira maioria loos maka sei pasa hodi hein teste tuir mai.

Pergunta hamutuk 50 ho lian ingles, entre númeru ne’e kuandu pergunta 25 mak loos hotu maka kandidatu sei pasa,no kontinua ba teste entrevista. Ida-ne’e konsidera tama ona iha sistema, ne’ebé bainhira kompañia husu ema hirak ne’e, mak SEFOPE fornese hodi sira halo prosesu tuir mai entre kandidatu ho empregadór.

Kandidatu ne’ebé tuir teste iha faze dahuluk ba lian inglés hamutuk rihun 50, ne’ebé abertura hala’o tiha ona iha loron sábadu (24/02), iha rejiaun Administrativu Espesiál Oé-cusse Ambeno (RAEOA).

Mudansa oráriu teste ba munisípiu haat

SEFOPE deside halo mudansa ba oráriu bazeia ba númeru kandidatu no munisípiu sira. Aleinde ne’e, bazeia mós ba forsa traballu SEFOPE nian ne’ebé mobiliza ba munisípiu.

Ho ida-ne’e, enkontru konsellu diretór ho Sekretáriu Estadu, Rogério de Araújo Mendonça deside halo mudansa loron ba teste lian inglés ba munisípiu hanesan Bobonaro, ne’ebé antes ne’e tuir planu sei realiza iha loron 16 no 17 marsu maibé muda ba loron 23 no 24 marsu, Lautém no Manatuto antes ne’e atu realiza iha loron 09 no 10 marsu maibé muda ba fali ba loron 06 no 07 abríl, no Dili antes ne’e iha loron 25 to’o 27 marsu muda ba loron 11 to’o 13 abríl.

“Razaun maka kuandu ami halo ho loron hanesan iha munisípiu haat, maka ami-nia forsa traballu la sufisiente, razaun seluk makai iha fulan-marsu ne’e tempu páskoa,” Diretór Jerál Carlito Rosário, dehan.

Tanba ne’e, SEFOPE husu kandidatu sira pasiénsia hodi prepara-an didi’ak ou aproveita tempu naton hodi tuir kursu lian inglés, hodi nune’e tuir teste ho valór ne’ebé di’ak.

Oráriu teste iha munisípiu

Oé-cusse iha loron 24 fevereiru 2024, iha Otél Estrela Bintang Lima Oepupo.
Aileu iha loron 02 to’o 03 marsu 2024, iha Escola tecnico vokasional Aileu.
Manufahi iha loron 02 to’o 03 marsu 2024, iha salaun enkontru salaun munisipál Manufahi.
Ainaro iha loron 02 to’o 03 marsu 2024, iha Escola Pré-Sekundária Benansio Feras no Tecvoc Gil Oan soru no Tékniku Vokasionál Gil Oan Soru.
Covalima iha loron 02 to’o 03 marsu 2024, iha Eskola Sekundáriu Públika 02.
Manututo iha loron 09 to’o 10 marsu 2024, iha Eskola Sékundária Jerál Kay Rala, Manatuto Vila (loron iha ona mudansa).
Baucau iha loron 09 to’o 10 marsu 2024, iha Jináziu/Gor Baucau.
Viqueque iha loron 09 to’o 10 marsu 2024, iha Eskola Ensinu Báziko 01 Beloi Viqueque.
Lautém iha loron 09 to’o 10 marsu 2024, Jinázio Lautém (loron iha ona mudansa).
Liquiçá iha loron 16 to’o 17 marsu 2024, iha Sentru Tokodede.
Ermera iha loron 16 to’o 17 marsu 2024, iha Eskola Nino Kanis Santana, Gleno Ermera.
Bobonaro iha loron 16 to’o 17 marsu 2024, iha Jinázio Gor Maliana (loron iha ona mudansa).
Ataúro iha loron 23 marsu 2024, iha salaun Autoridade munisípiu Ataúro.
Dili iha loron 25 to’o 27 marsu 2024 GMT Dili (loron iha ona mudansa).