CLN planeia sosa produtu lokál hodi asegura estoke iha TL
DILI, 28 fevereiru 2024 (TATOLI)—Diretór Ezekutivu Sentru Lojístika Nasionál (CLN, sigla portugés), Jacinto Paiju, informa, iha tinan 2024 ne’e, CLN planeia atu sosa produtu lokál iha munisípiu sira hodi asegura estoke iha Timor-Leste (TL).
“Produtu ne’ebé mak prioridade ba CLN atu sosa iha tinan ne’e mak hanesan hare-kulit, foremungu, fore-rai, batar no seluktan ne’ebé ita haree ba munisípiu sira ne’ebé mak produtu sira ne’e barak, entaun ita sosa hodi asegura estoke iha ita-nia rain tanba durante ne’e ita dependénsia de’it ba importasaun husi rai-li’ur mai,” Jacinto Paiju informa ba jornalista sira iha City8, ohin.
Diretór ne’e dehan, CLN tau prioridade ba produtu lokál ne’e tanba populasaun Timor-Leste maioria konsumu hahán hirak ne’e.
“Produtu lokál ita kontinua sosa tanba IX Governu nia programa mai mak CLN atu reforsa liuhusi promove produtu lokál no kapasitasaun entaun oinsá mak CLN atu halo mak kontinuasaun sosa produtu lokál hodi nune’e asegura rezerva estoke,” nia informa.
Ezekutivu ne’e esplika, polítika ne’ebé atu halo mak liuhusi provoka sosa produtu lokál hodi garante insentiva produsaun no garante ba merkadu sira.
“Planu ida ba futuru atu fó subsídiu ba funsionáriu Estadu atu nune’e garante merkadu hodi fó serbisu ba joven sira tanba, ita-nia rai abandonadu iha territóriu nasionál ne’e barak tanba ita-nia sistema agrikultura sei tradisionál dalaruma joven sira la halo no la iha servisu iha área natar ka to’os no mós animál husik de’it, irrigasaun la iha. Entaun, ida ne’e ita presiza implementa sistema agrikultura modernu hodi hasa’e produsaun sira iha ita-nia rain,” nia haklaken.
Diretór Ezekutivu CLN, Jacinto Paiju, informa tan katak iha tinan 2024 ne’e, Governu liuhusi CLN planu tau osan atu sosa produtu lokál ho montante hamutuk 4 mil dolár.
Entretantu, iha Programa Governu Konstitusionál da-sia, durante ninia mandatu, alende prioridade seluk sei halo mós promosaun ba diversifikasaun ekonómiku.
Iha Orsamentu Jerál Estadu (OJE) 2024, verba alokada ba CLN hamutuk 7.291.986 USD. Totál orsamentu ne’e aloka ba programa sira hanesan Funsionamentu no dezenvolvimentu institusionál hamutuk 3.030.703 USD no mós ba Diversifikasaun ekonómika ho montante orsamentu hamutuk 4.261.283 USD.
Notísia relevante:CLN hahú halo intervensaun merkadu hodi responde folin foos sa’e
Jornalista : Felicidade Ximenes
Editór: Rafael Ximenes de A. Belo
