EDUKASAUN

Inan-aman kontribui sosa ekipamentu prátika ba Eskola ESTV Becora

Inan-aman kontribui sosa ekipamentu prátika ba Eskola ESTV Becora

Eskola Ensinu Sekundáriu Tékniku Vokasionál (ESTV)-Eskola Ekonomia no Komérsiu Becora (EEC-sigla portugés). Foto espesiál

DILI, 28 fevereiru 2024 (TATOLI)—Diretór Eskola Ensinu Sekundáriu Tékniku Vokasionál (ESTV/STM) Becora, Feliciano de Almeida Belo, hateten estudante nia inan-aman kontribui $10 sosa ekipamentu ba Eskola Ensinu Tékniku Vokasionál (STM) Becora) hodi estudante sira utiliza halo prátika ofisina loro-loron nian.

“Kontribuisaun fulan-fulan inan-aman nian mak apoia eskola hodi sosa ekipamentu no halo prátika. Ita labele hein de’it Governu, ne’e susar uitoan,” Diretór Eskola Ensinu Sekundáriu Tékniku Vokasionál (ESTV/STM) Becora ne’e hateten ba Agência Tatoli iha ESTV Becora, kuarta ne’e.

Eskola Ensinu Sekundáriu Tékniku Vokasionál, Becora. Imajen TATOLI/Nelia Fernandes.

Ho kontribuisaun inan-aman ne’e mak agora prátika ofisina nian iha eskola ne’e la’o normál no laiha difikuldade.

Iha janeiru 2024 ne’e, prátika paradu tanba ekipamentu prátika ba ofisina ne’ e laiha, maibé bainhira eskola ne’e halo enkontru ho inan-aman no inan-aman deside apoiu ba materiál prátika entaun to’o agora prátika la’o normál.

“Ho inan-aman nia apoiu ita-nia estudante prátika la’o normál fali tiha ona. Durante ne’e, ita paradu fulan ida mak iha janeiru ne’e de’it tanba de’it bazea ba sirkulár Ministériu Edukasaun nian maibé agora prátika la’o normál fali,” nia dehan.

Mezmu Governu kada tinan sempe fó ajuda liuhosi konsesoens eskolár nian kada ema hetan $2 ne’e foin Governu anteriór hasa’e iha tinan 2023 maibé antes ne’e $1 de’it.

Estudante ESTB Becora, Juninho Duarte Aparício do Santos, hateten materiál prátika iha eskola ne’e kompletu no semana ida dala ida ba prátika nian.

“Ami-nia prátika ba materia ne’e di’ak no tuir aula ne’ebé iha. Prátika ne’e ami halo semana ida dala ida ba materia ida-nian. Ba ha’u laiha difikuldade ba matéria prátika nian tantu aula baibain nian. Buat hotu la’o di’ak no di’ak hotu,” nia dehan.

Eskola Ensinu Sekundáriu Tékniku Vokasionál (ESTV/STM) Becora ne’e ho nia profesór permanente 76 kompostu hosi feto na’in-15 no restante mane, depois na’in-tolu (3) invalidu ka moras la tama ho profesór kontratadu iha na’in-sia (9) ne’ebé kontrata iha 2023 no termina sira-nia kontratu ne’e iha 31 dezembru.

Totál estudante iha eskola refere hamutuk 1.545 ne’ebé kompostu hosi feto 315 no restante ne’e mesak mane, maibé númeru ida-ne’e la sura ho estudante sira-ne’ebé halo prátika ka estájiu iha terrenu.

Iha eskola ne’e iha departamentu neen (6) mak eletresidade, informátika, eletrónika, mekánika produsaun, mekánika automovel no konstrusaun sivil.

Kona-ba fasilidade eskola nian, nia dehan, sufisiénte hela inklui sala-de-aula ba estudante maibé materiál hodi halo prátika hanesan eletresidade nia fiu, besi no buat seluk tan ne’e tenke sosa mak bele halo prátika.

“Ita-nia sala-de-aula iha ne’e hamutuk 16 no ita akumula estudante 35 ba kada sala, ida-ne’e sufisiénte hela ba ita, só problema mak profesór. Tanba ne’e, ha’u hakarak rekomenda ba ministériu edukasaun katak sirkulár ne’ebé mak la’o. Hori bainhira ami hala’o enkontru no dehan eskola públiku labele iha propinas. Entaun, ministériu edukasaun tenke tau atensaun ba eskola tékniku sira no halo planu hodi tau osan ba prátika ofisina nian ne’e, la’ós ba prátika nian maibé planu ba estajiu,” nia dehan.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!