COVALIMA, 28 fevereiru 2024 (TATOLI) – Komandu Polísia Nasionál Timor-Leste (PNTL) Covalima simu ona despaixu husi Tránzitu nasionál ne’ebé bandu bis Dili-Suai halo movimentu iha tempu kalan.
Hafoin simu despaixu komandu mós orienta kedas ba komandante eskuadra no komandante tranzitu atu hato’o informasaun ba komunidade no motorista bis sira labele halo movimentu iha tempu kalan, nomós sei taka avizu iha autoestrada postu administrativu Zumalai.
Komandante PNTL,Superintendente Polísia Calisto Gonzaga, salienta katak despaixu ne’ebé Tránzitu Nasionál fó sai ko’alia de’it mak bandu bis halo movimentu iha tempu kalan, maibé la temi kona-ba bandu sidadaun ho motorizada sira halo movimentu iha kalan.
Motorista Octaviano do Carmo dehan nia parte simu ona informaun katak tránzitu bandu bis halo movimentu iha tempu kalan, maibé atu viajen bá Dili tenke iha loron hahú 8h00 no to’o iha dili iha tuku 06:00 loraik.
“Ami prontu kumpre orientasaun ne’ebé fó sai husi PNTL, liuhusi seksaun Tránzitu hodi halo movimentu iha tempu kalan. Maibé, haree ba kondisaun estrada bainhira bis sira sai tuku 6 dadeer to’o iha Dili iha kalan ona”, nia reforsa.
Tuir avizu ne’ebé fó sai husi Diresaun Nasionál Transporte Terrestre hamutuk ho Polísia Tránzitu Nasionál, iha loron 20 fevereiru ne’e, halo ona mudansa oráriu ba sirkulasaun bis ho diresaun Dili bá munisípiu no husi Munisípiu mai Dili nia viajen iha tempu kalan altera ba loron hanesan dader tuku 6:00 sai husi munisípiu no to’o iha Dili iha tuku 6:00 loraik. Bainhira karreta sira ne’e viola regra sei aplika sasaun tuir kódigu estrada iha artigu 4.
Jornalista: Celestina Teles
Editora: Maria Auxiliadora
