PNTL detein suspeitu na’in lima ligadu ho kazu Becusse

DILI, 28 fevereiru 2024 (TATOLI)- Komandante Polísia Nasinál Timor-Leste (PNTL) Munisípiu Dili, Superintendente Xefe Polísia Orlando Gomes, hateten, PNTL detein ona suspeitu nian-lima ne’ebé suspeitadu envolve kazu hamate vítima Armandinho Lemos Soares iha área Becusse Postu administrativu Cristo Rei, Munisípiu Dili, kuarta ne’e.
Superintendente Xefe Polísia Orlando Gomes relata kronolojia akontesimentu katak Armandino mai ho kolega ida iha kuarta (28/2) madrugada ne’e ho motorizada sai iha hosi uma Becusse Sentrál, Aldeia Karrega Tiru atu ba iha Metiaut.
Bainhira to’o iha área Metiaut vítima Armandinho Lemos Soares ho nia kolega konsege foti subar duni bibi ida iha Metiaut no sira rua tula ho motór liuhosi área Ponte BJ Habibie mai diresaun Ponte My Friend atu fa’an bibi iha merkadu Ponte My Frend nian.
Maibé bainhira to’o mai iha area Ponte My Friend vítima ho nia kolega lakonsege fa’an bibi ne’e no sira ho motór ba fali diresaun Taibesi nian. To’o tiha rotunda Taibesi vítima ho nia maluk hetan tán nia kolega na’in rua ho motór hodi sira halai hamutuk mai iha Becusse.
Nune’e to’o tiha iha Becusse, vítima tanba bibi ne’ebé sira lori ne’e namek makaas entaun joven no komunidade sira ne’ebé mak iha Becusse ne’e rona bibi ne’e namek hanoin kala ne’e ema ne’ebé foti ka lori ema nia sasán sein fó hatene ne’e.
Entaun joven sira mai tuda fatuk hasoru vítima ho na kolega nian tolu ho nune’e iha joven sira iha área Becusse tuda kona vítima Armandinho Lemos ne’ebé tuur iha kotuk fatuk kona iha ulun nune’e vítima Armandinho Lemos monu ba rai hodi baku nia ulun ba estrada ran sai barak to’o vítima hakotu iis.
Vítima hakotu iis iha kuarta (28/2) 4:00 madrugada no latan de’it iha estrada Becusse nian, hafoin akontesimentu nia kolega na’in tolu ho motorizada halai sses hodi hosi matebian latan de’it iha estrada.
Ho nune’e, depois insidente ne’e, PNTL Eskuadra Cristo Rei no investigasaun sira tuun kedan ba iha fatin akontesimentu hodi asegura kedan fatin akontesimentu.
“Kazu ita mós foti sasin sira balun ba halo identifikasaun hodi fó informasaun ba ita identifika suspeitu ba kazu ne’e. No, bazea ba informasaun sasin sira ita identifika supeitu ne’ebé sai autór prinsipál ne’ebé envolve kazu hamate vítima Armandinho nia mate iha suspeitu na’in lima mak ita detein hanesan BG, ScS, LBS, LAS no MX,” Superintendente Xefe Polísia Orlando Gomes hateten ba jornalista liuhosi konferénsia imprensa, iha Komandu PNTL Dili, Caicoli, kuarta ne’e.
Nia dehan, suspeitu sira ne’e agora daudaun detein ona iha sela detensaun iha Eskudra PNTL Cristo Rei durante oras 72 hodi aprezenta ba Ministériu Públiku hodi submete ba prosesu interogatóriu dahuluk.
Komandante Orlando Gomes haktuir PNTL mós oras ne’e daudaun asegura ona vítima Armandinho na’in tolu ne’ebé mak momentu ne’e ho motorizada la’o hamutuk vítima to’o vítima lakon vida.
“Matebian nia kolega na’in tolu ne’ebé mak momentu la’o ho matebian mós polísia asegura hotu ona, sira ne’e sai hanesan sasin,” nia adianta.
Autoridade polisiál ne’e hateten, bibi ne’ebé maka matebian Armandinho tula iha motor leten daudaun ne’e PNTL asegura hotu ona iha eskuadra Cristo Rei hodi sai hanesan evidénsia ida ba kazu ne’e.
Orlando hateten, mate isin Armandinho Lemos Soares agora daudaun iha ona Hospitál Nasionál Guido Valadares Dili (HNGV) atu halo prosesu autópsia.
Jornalista: Natalino Costa
Editór: Rafael Ximenes de A. Belo

