Abertura formasaun advogadu, MJ husu seriedade no disiplina
DILI, 01 marsu 2024 (TATOLI)-Ministériu Justisa (MJ) halo abertura ba VI formasaun advogadu ba formandu na’in 35.
“Ohin, ita halo abertura VI formasaun ba Advogadu Privadu tinan ne’e,” Ministru Justisa, Sergio Hornai hateten ba jornalista sira hafoin halo abertura ba VI formasaun iha Sentru Formasaun Jurídiku no Judisiária Caicoli, sesta ne’e.
Ministru justisa ne’e dehan, formadu sira sei frekuenta teória no prátika durante tinan rua nia laran, hafoin ida ne’e mak sei kontinua selesiona ba iha kareira ba Advogadu Privadu hodi integra sira-nia aan iha Ordem dos Advogados hodi fó asisténsia ba povu.
“Ha’u husu ba formadu sira na’in-35 ne’ebé agora daudaun iha ne’e, tenke iha seriedade ba iha formasaun ida ne’e, tenke hatudu disiplina durante formasaun, nune’e bele konklui formasaun ida ne’e ho di’ak, atu nune’e futuru bele sai Avogadu Privadu ida ne’ebé di’ak hodi fó asisténsia legál ba ita-nia sosidade sira,” Governante ne’e fó hanoin.
Sergio Hornai kompromete sei kontinua tau prioridade ba formasaun Majistradu Judisiáriu Juíz, Majistradu Ministériu Públiku, Defensória Públiku no ofisiál Justisa, hodi nune’e ba futuru bele fó asistensia legál ba públiku ho di’ak liután.
Governante ne’e rekoñese katak agora daudaun rekursu umanu setór justisa sei menus liuliu Juíz, Prokuradór Defensór sei menus.
“Setór judisiáriu atu la’o di’ak presiza mellora rekursu umanu, tanba ne’e IX Governu Konstitusionál liuhosi Ministru Justisa sei foka ba kursu formasaun ba majistradu judisiál, majistradu Ministériu Públiku no Defensória inklui Ofisiál Justisa atu nune’e iha futuru ba fó asisténsia legál ne’ebé di’ak ba komunidade,” nia argumenta.
“Ha’u sei halo enkontru ho parte Tribunál, Prokuradór Jerál Repúblika no Defensória Públika atu haree ba rekursu sira iha instituisaun judisiál sira ne’e, atu nune’e sira bele prepara planu ne’ebé di’ak hodi ita tau ba iha polítika rekrutamentu ninian,” nia adianta.
Iha fatin hanesan, Diretora Sentru Formasun Jurídika Judisiária, Marcelina Tilman da Silva, hateten, SFJJ tinan ne’e fó formasaun Advogadu Privadu na’in-35. Formadu sira sei hahú aula formasaun teória iha segunda (04/03) semana oin.
“Durante formasaun formadu sira sei aprende liu ba matéria direitu liuliu ba funsaun Advogadu nian, “nia dehan.
Diretora Marcelina Tilman informa, formandu sira ne’e sei halo formasaun téoria durante fulan 15 no prátika fulan haat konta tinan rua formandu sira halo formasaun teória no prátika, hafoin ida ne’e, ba hirak ne’ebé ninian aproveitamentu di’ak mak sei sai hanesan Advogadu.
Ezekutiva ne’e mós hateten, iha fulan abríl tinan ne’e sei loke vaga ba VIII formasaun ba Juiz, Prokuradór no Defensór Públiku hamutuk 60, ba formasaun Juíz na’in 20, formasaun Prokuradór na’in-20 inklui ba formasaun Defensór na’in -20.
Nia dehan, formasaun ba ba Juíz, Prokuradór no Defensór Públiku sei halo iha setembru tinan ne’e.
Enkuantu formasaun ba Juíz Prokuradór no Defensór Públiku ba teória iha fulan 18, prátika iha fulan neen no estájiu tinan ida enkuantu tránzita ba karreira Juíz, Prokudór inklui Defensór tenke priense kritériu tinan tolu.
Iha fatin hanesan, formanda Elisabeth Rosa da Costa Lopes sente kontente tanba bele liu iha vaga VI kursu formasaun ba Advogadu.
Ho nune’e nia komprometidu sei hatudu nia seriadade no aproveitamentu ne’ebé di’ak durante formasaun ne’e hodi nune’e bele sai Advogadu Privada iha futuru.
Jornalista: Natalino Costa
Editór: Rafael Ximenes de A. Belo
