iklan

COVALIMA, HEADLINE

Autoridade Fohorem preokupa eletrisidade mate-lakan

Autoridade Fohorem preokupa eletrisidade mate-lakan

Liña eletrisidade.

COVALIMA, 01 marsu 2024 (TATOLI) – Xefe suku Fohorem, Júlio Ferreira Alves, preokupa ho eletrisidade mate-lakan, tanba bele estraga komunidade sira-nian ekipamentu eletróniku hanesan jeleira, televizaun, nomós difikulta atividade negosiante sira iha postu administrativu Fohorem, iha Covalima.

“Hanesan líder lokál preokupa, tanba iha Fohorem, ahi eletrisidade problema boot sempre mate-lakan, nune’e estraga komunidade nia sasán eletróniku sira, nomós estraga negosiante sira-nian ayam potong ne’ebe atu fa’an no seluk tan”, Júlio Alves informa iha Fohorem.

Nia salienta katak hanesan lidér lokál iha reponsabilidade hodi konfirma ba tékniku Eletrisidade Timor-Leste, Empreza Públika (EDTL, E.P), maibé sira esplika katak ekipamentu ne’ebé instala iha postu Tilomar bainhira ema balun book bosok de’it muda aan, entaun afeta ba ahi eletrisidade iha Fohorem mate-lakan. Nune’e, nia husu ba tékniku sira tenke kontrola ahi hodi bele garante nia lakan durante oras 24, se la’e komunidade asesu ahi la to’o oras 24.

Xefe Unidade EDTL, E.P, Anorito Mendonça, dehan nia seidauk simu informasaun kona-ba ahi eletrisidade mate-lakan iha Fohorem, tanba bainhira iha problema ruma tékniku sira sempre informa ba EDTL munisipál.

“Ha’u destaka ona tékniku EDTL, E.P ba postu administrativu sira, nune’e bainhira iha problema kona-ba eletrisidade mate tenke informa ba tékniku sira mai EDTL sentrál, se la’e hato’o ba tékniku sira destaka iha postu, nune’e bele rezolve kedas”, nia esplika.

EDTL koloka ona tékniku iha postu administrativu hitu hanesan iha  Tilomar na’in-ida, Fatumea tolu, Fohorem rua, Fatululik rua, Maucatar no Zumalai ida-ida.

Covalima iha suku 30 no aldeia 148 no daudaun ne’e aldeia 119 mak asesu ona eletrisidade no falta 29.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!