iklan

HEADLINE, KAPITÁL

Gregório Saldanha simu pose husi MAE, Prioriza área 12 durante mandatu

Gregório Saldanha simu pose husi MAE, Prioriza área 12 durante mandatu

PAM foun munisipiu dili Gregorio Saldanha. Foto Tatoli/Antonio Daciparu

DILI, 01 marsu 2024 (TATOLI)—Gregório da Cunha Saldanha simu pose husi Governu liuhusi Ministériu Adminsitrasaun Estatál (MAE) sai Prezidente Autoridade Munisípiu (PAM) Dili, hodi substitui Guilhermina Filomena Saldanha Ribeiro.

“Ha’u ohin simu kargu todan ida hanesan prezidente Autoridade Munisípiu Dili, iha sidade ida komplexu ho probelma oioin. Dili hanesan kapitál no odamatan-boot ba Timor-Leste presiza halo mudansa ba área sira tuir kompetensia ne’ebé mak atribui,” Gregório Saldanha hateten, iha nia diskursu, iha ámbitu seremónia tomada pose iha Autoridade Munisípiu Dili (AMD), Matadouru, Dili, ohin.

“Ami sei servisu maka’as hamutuk ho funsionáriu tomak iha autoridade munisípiu Dili hodi halo koordenasaun servisu ho autoridade sira iha postu administrativu suku no aldeia no autoridade govermentál no naun-govermentál sira iha munisípiu Dili ho objetivu hodi buka solusaun ba problema sira nune’e dezenvolvimentu nasionál bele lao lalais no loloos iha kapitál Dili ida hakmatek no moos, furak no fatin ba moris di’ak,” nia garante.

Hanesan PAM Dili, Gregório Saldanha halo identifikasaun ba problema no buka atu solusiona liuhusi prioridade 12 hodi implementa, hanesan:

  1. Identifikasaun problema sira ho nia solusaun mak dahuluk odiu vigansa no violénsia: Presiza hapara odiu, vigansa no violénsia entre komunidade liuliu joven sira violénsia husi autoridade sira husi populasaun no violénsia husi populasaun hasoru autoridade sira, nune’e toman aan   atu hala’o idaidak nia direitu no kumpri nafatin dever atu respeita mós ema seluk nia direitu;
  2. Falta kampu servisu: Presiza fasilita formasaun tékniku vokasionál, prontu servisu no hadi’a regulamentu sira hodi fasilita investór rai-laran no rai-li’ur   hodi loke kampu servisu ba joven sira tuirmai;
  3. Lixu no dezastre naturál: Ema hotu presiza hatoman aan hamoos nia hela fatin ka servisu fatin no autoridade munisipál presiza halo kalendáriu rutina hodi halo, mobiliza komunidade no instituisaun Estadu ka ONG sira hodi kuda ai-oan ka du’ut iha tempu udan iha foho-leten, foho-lolon no rai-tetuk sira, ho objetivu atu prezerva bee no hapara dezastre naturál iha tempu futuru mai no tempu bailoron presiza loke bee-dalan sira ne’ebé aat ka nakonu ho fo’er hodi hamoos.  Presiza rekruta veteranu ka kombatente no joven sira hodi tau-matan lixu no asegura jardin ho tasi-ibun ka tasi-laran labele fo’er;
  4. La iha fatin ka rai atu hakoi mate: Presiza rekupera no moderniza rate sira iha Dili laran no halo osuáriu hodi haloot mate-ruin sira   ho konsiderasaun ba problema naturál, ema aumenta rai la aumenta, espesialmente rate Santa Krús   nu’udar patrimóniu nasionál luta juventude nian presiza loke fali dalan tuan sira iha rate-laran hodi fasilita movimentasaun bainhira selebra loron boot sira hanesan 12 Novembru ka finadu;
  5. La iha planu urbanístiku ida di’ak: Presiza   planeamentu urbanu di’ak hodi halo bairru foun hodi halo modernu apartamentu kompletu ho kapela merkadu, kampu desportu, klínika, fatin ba divertimentu, fatin-reuniaun no seluktan;
  6. Merkadu ka Estrada-ninin no engarafamentu sira: Presiza haboot merkadu ezistente sira ho modelu uma-andar tanba AMD konsidera nafatin ema aumenta rai la aumenta hodi evita ema fa’an sasan iha Estrada-ninin no presiza regula oráriu movimentasaun transporte sira iha sidade Dili ne’ebé oras ne’e sai problema lorloron;
  7. La iha jestaun di’ak ba jardin no fatin-turístiku: Presiza transfere jestaun jardin sira ba empreza nasionál sira, presiza kuda ai-horis sira ho valór istóriku no valór ekonómiku hanesan kafé, ai-kameli, teka, ho seluktan iha Jardin palásiu soberanu haat nia oin, hodi reprezenta no promove TL nia rikusoin. Presiza dezenvolve ba iha Dili ho planu úniku iha área komérsiu, desportu no fatin divertimentu sira ne’ebé dedika ba turista rai-laran no rai-li’ur no mós hadook joven sira  husi  prátika violénsia. Presiza harii parke hodi kuda aihoris barak nune’e bele hamatak no proteje sidade Dili kuda, ai-kasi iha jardin sira hodi rekupera Dili nia identidade;
  8. Monumentu no naran ba dalan sira la reprezentativu: Presiza tau funu na’in sira-nia naran no estatua iha rotunda sira no tau figura importante sira iha área polítika dezenvolvimentu   kultura, desportu múzika no seluktan;
  9. Falta enerjia elétriku no bee-moos: Presiza  dezenvolve enerjia solar hodi  hamenus dependénsia  ba enerjia petróliferu  hodi  prodús eletrisidade, presiza  halo rezervatóriu hodi salva bee  ne’ebé  tempu udan  mota lori hamutuk  ho fo’er  animál ka ema tun hamutuk  ba tasi nune’e bele utiliza bee  iha  rezervatóriu ba iha  nesesidade oin oin, presiza harii mini-estasaun sira ne’ebé trata bee  hodi jere bee-fo’er sira, Autoridade Munisípiu Dili hamutuk ho autoridade Governu iha suku no aldeia sira  tenke kontrola kanu sira ne’ebé  lori  bee mai komunidade  halo  utilizasaun ba nessidade sira  ne’ebé dala barak  kontra regra sira;
  10. Jogu makina ho bola guling ka fatin protistuisaun no moris buras: Presiza kontrola jogus no makinári sira, bola guling no fatin protistuisaun hodi evita prátika ilegál sira ne’ebé sees husi obrigasaun sira ne’ebé selu taxa ba Estadu no evita labarik ki’ik sira-nia envolvimentu no prevene moras at iha komunidade nia leet;
  11. Estadu lakon nia patrimóniu rai no uma: Presiza identifika no salva Estadu nia patrimóniu no rai, uma sira ne’ebé oras ne’e fó aluga ba ema rai-laran ka rai-li’ur ho osan-ki’ik maibé, sira aluga tutan ba ema ho osan-boot entaun Estadu lakon;
  12. Estadu lakon rastu istóriku funu nian: Presiza identifika prezerva no sítiu istóriku hanesan japonés ninia abrigu sira nu’udar testemuña ba segunda guerra mundiál no mós rekupera fali kadeia ka fatin akontesimentu importante ruma iha tempu funu nian ne’ebé oras ne’e ema uza halo negósiu espesialmente ba jardin Igreja Motael nia oin, AMD presiza  troka Monumentu  12 Novembru Motael  ba Monumentu Jardin Saudozu Sebastião Gomes.

“Tanba ne’e hahú ohin ha’u simu pose AMD hakarak deklara ba públiku katak Dili sai moos no hakmatek, Dili furak no Dili sai fatin ba ema hotu moris di’ak,” nia reiteira.

Iha fatin hanesan, Ministru Administrsaun Estatál, Tomas Cabral husu, “Ba Prezidente Autoridade Munisípiu Dili atu servisu ho profisionalizmu hodi serbi populasaun sira iha kapitál Dili ho di’ak,” Tomas Cabral   konklui.

Jornalista: Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!