DILI 01 marsu 2024 (TATOLI)–Banku Nasionál Komérsiu Timor-Leste (BNCTL, sigla portugés) atribui ona kartaun Automated Teller Machine (ATM) P24 ba idozu no invalidez hamutuk rihun 15-resin.
“Ami iha ona konkordánsia ho Institutu Nasionál Seguransa Sosiál (INSS), katak iha 18 marsu 2024 hahú halo pagamentu idozu no invalidés, bolsa da mãe ka hirak ne’ebé simu subsídiu Estadu. Antes ne’e kada tinan selu dala-rua, ami konkorda katak ami prontu selu kada tinan dala-haat, katak kada fulan-tolu bele selu, daudaun sira ne’ebé iha ona kartaun ATM banku bele selu kada fulan, hahú marsu ba oin sira bele foti sira-nia osan fulan-fulan no labele hein to’o fulan-tolu,” Prezidente Komisaun Ezekutiva BNCTL, António Francisco Vitor, relata, hafoin reuniaun ho Vise Primeiru-Ministru, Mariano Assanami Sabino, iha salaun enkontru, Palásiu Governu, sesta ne’e.
Notísia relevante: INSS planeia halo pagamentu ba idozu no invalidez kada fulan
Nia dehan, bainhira ferik no katuas ne’ebé moras no labele simu pensaun, família labele laran susar tanba Banku Nasionál garante sira-nia direitu sei la lakon.
“Sira ne’ebé moras, difisiente matan sai difikuldade ba sira, entaun família tenke informa ba autoridade lokál, katak ema sira ne’e labele ba simu sira-nia pensaun, kuandu informadu maka ami selu hotu tiha ema barak ami sei to’o iha sira-nia fatin hodi selu fali sira, ne’ebé tenke pasiénsia kuandu urjente liu fó hatene ami ba selu uluk sira tanba akontese katak tanba de’it oan sira presiza osan, inan-aman moras hela mós obriga hulan ba simu osan,” Prezidente apela.
INSS fó ona dadus benefisiáriu globál ba programa pensaun sosial hamutuk rihun 120 ho nia orsamentu hamutuk $86.023.178 ba BNCTL hodi halo verifikasaun kuantidade benefisiáriu ne’ebé mak uza ona konta bankária inklui ATM no seidauk uza.
Antes ne’e, Konsellu Ministru aprova ona alterasaun dahuluk dekretu-lei númeru 53/2022, 20 jullu, ne’ebé aprova rejime jurídiku pensaun sosiál invalidez no velhice iha ámbitu rejime naun kontributivu seguransa sosiál, mensiona mós katak subsídiu fahe tuir kategoria idade, ne’ebé kategoria dahuluk hosi idade 60-69 sei hetan $60, kategoria daruak idade 70-80 hetan $80 no kategoria datokuk ho idade 80 ba leten sei simu $100.
Bazeia ba dadus provizóriu, iha idozu hamutuk 200 resin maka lakon ona vida iha tinan kotuk, nune’e tinan ne’e BNCTL kansela pagamentu pensaun sosiál.
Jornalista : Antónia Gusmão
Editora : Julia Chatarina
