iklan

POLÍTIKA

Kalohan sei retoma pozisaun nu’udar Deputadu iha 04 marsu

Kalohan sei retoma pozisaun nu’udar Deputadu iha 04 marsu

António da Conceição ‘Kalohan'. Imajen Tatoli/António Gonçalves.

DILI, 01 marsu 2024 (TATOLI)—Deputadu titulár lista Partidu Demokrátiku (PD), António da Conceição ‘Kalohan’, kinta (29 fevereiru 2024) ne’e, hato’o karta ba Prezidente Bankada PD iha Parlamentu Nasionál (PN) ho asuntu deklarasaun retoma mandatu pozisaun nu’udar Deputadu iha 04 marsu semana oin.

Notísia Relevante: Ezonera António da Conceição, Assanami: “Ne’e Prezidente nia Podér”

“Liuhosi bibán ida-ne’e, ha’u mai informa katak ha’u deside fila-fali ba Parlamentu Nasionál hodi hala’o ha’u-nia kna’ar nu’udar Deputadu VI lejislatura periódu 2023-2028 iha loron 04 fulan marsu 2024. Razaun ha’u fila tanba misaun ne’ebé ha’u simu nu’udar embaixadór hodi simu pose iha 12 dezembru 2023 ne’e laiha kontinuidade. Ha’u hetan ona ezonerasaun hosi Prezidente Repúblika, tanba ne’e laiha inkompatibilidade atu ha’u ba ezerse fali ha’u-nia mandate nu’udar Deputadu,” refere karta hosi António da Conceição ‘Kalohan’ ne’ebé hato’o ba Prezidente Bankada PD iha PN, ne’ebé TATOLI asesu, sesta ne’e.

Liuhosi karta ne’e, sita mós hodi kópia karta refere primeiru ba Prezidente Partidu Demokrátiku (PD), daruak Prezidente Parlamentu Nasionál, datoluk ba líder bankada parlamentár sira iha PN ho sekretariadu PN.

Husi karta ne’e Kalohan agradese ba Deputada Rozena Martins ne’ebé hatudu nia disponibilidade hodi asume ona funsaun temporária hahú hosi 12 dezembru 2023 mai to’o ohin loron.

“Husu ba prezidente bankada hato’o pedidu ba Prezidente Parlamentu Nasionál hodi anúnsia ha’u nia inísiu funsaun nu’udar Deputadu bankada Partidu Demokrátiku nian hahú iha loron 04 marsu 2024,” refere karta ne’e.

Entertantu, tuir ajenda meza Parlamentu Nasionál ne’ebé Agência Tatoli asesu, ohin konfirma mós katak iha reuniaun plenária iha loron 04 marsu 2024 (segunda-feira) ne’ebé abertura iha tuku 09h00 dadeer iha periódu antes orden do dia, sei fó sai informasaun kona-ba retoma mandatu hosi António da Conceição ‘Kalohan’.

Jornalista : Nelson de Sousa

Editór       : Cancio Ximenes  

iklan
iklan

Leave a Reply

iklan
error: Content is protected !!