iklan

NASIONÁL

KTR-TL prodús lilin iha Kasait-Liquiça

KTR-TL prodús lilin iha Kasait-Liquiça

Labarik sira halakan lilin sakramentu eukaristia nian, iha Igreja Paroku São Jose Ai-Mutin Díli, kuarta (05/10). Imajen Tatoli/Francisco Sony.

DILI, 01 marsu 2024 (TATOLI)–Kooperativa Turizmu Relijiozu Timor-Leste (KTR-TL) iha Asosiasaun Turismu Relijiozu Timor-Leste (ATR-TL) nia mahon kompostu hosi relijiaun Katólika, Musulmanu, Protestante, Hindu no Budah halo produsaun lilin iha Kasait-Tibar-Liquiça.

Prezidente KTR-TL, Orlandu Petrus, hateten objetivu hosi produsaun lilin ne’e, tanba relijiaun hotu-hotu uza lilin maioria liuliu katólika, maibe dalabarak importa hosi rai-li’ur mai entaun iha hakarak prodús lilin iha rai-laran.

“Asosiasaun Turismu Relijiozu Timor-Leste (ATR-TL) haruka nia ema ba aprende iha Bandung-Indonézia hodi aprende no halo estudu viabilidade ida oinsa prosesu ba produsaun lilin. Ema na’in-rua (2) hetan treinamentu iha Bandung iha novembru 2023 tuir formasaun iha Bandung- Indonésia durante semana ida,” nia hateten ba jornalista sira, sesta ne’e.

Produsaun lilin ne’e hetan apoiu osan hosi gabinete Servisu Apoiu Sosiedade Sivil (SASCAS) hodi sosa ekipamentu hanesan mákina ne’ebé iha kapsidade halo produsaun lilin dala ida ho kuantidadde lilin 300.

“Agora ami investe ho $9.000. Ida-ne’e hosi SACAS hodi sosa materiál sira hanesan mákina rua ba produsaun lilin no materiál prima iha Bandung-Indonesia,” nia dehan.

KTR-TL mós uza osan hosi membru sira-nian hamutuk $2.000 hodi hadi’a fatin ba produsaun lilin iha Kasait iha Liquiça, no garante presu lilin KTR-TL sei diferensa presu lilin iha merkadu tamba sei determina presu asesível ka kiik.

“Ami halo hela estudu ida no analiza kustu ba produsaun no operasionál hodi determina presu lilin. Tanba ne’e mak ami seidauk faan ho folin ne’ebé bele kompete iha merkadu. Maibé ami prodús tiha ona,” nia dehan.

Lilin ne’ebé prodús hosi KTR-TL iha kualidade diferensa hanesan iha merkadu, tanba bainhira sunu laiha lilin been maibé nia hanesan gas kuandu sunu lakan hotu ona, nia laiha been hanesan atu kria lixu.

Ba futuru, KTR-TL mós hakarak kria travel ajensia ne’ebé sei sirkula iha Timor laran hodi transporta vizitante sira hosi estranjeiru ba fatin turizmu relijiozu iha país ne’e.

Membru KTR-TL, Oracio Mendes, hateten produsaun lokal ba lilin ne’e ladefísil no kada membru KTR-TL sei halo promosaun ba nia sarani no komunidade hodi bele sosa.

“Promosaun ne’e klaru ona. Ba ami lasusar halo promosaun tanba igreja no relijiaun seluk sai padraun ba promosaun, tanba sira mos na’in ba atividade ne’e,” nia hateten.

Jornalista : Jesuína Xavier

Editór       : Cancio Ximenes

iklan
iklan

Leave a Reply

iklan
error: Content is protected !!