DILI, 01 marsu 2024 (TATOLI) – Ministériu Agrikultura, Pekuária, Peska no Floresta (MAPPF) halo ona pagamentu 40%, iha faze dahuluk, ba kafekultór sira liuhusi Asosiasaun Kafé Timor (ACT, sigla portugés) no Kooperativa Kafé Timor (CCT, sigla portugés), tanba sira maka diretamente implementa programa reabilitasaun ne’e.
Diretór-Jerál Floresta, Raimundo Mau, informa katak kada ektare kafé selu ho montante $340 no hun ida sei kona sentavu 0.21. Orsamentu ne’ebé prevee ba realiza programa rebilitasaun kafé hamutuk millaun $4-resin.
“Ami halo ona prosesu reabilitasaun ba kafé tuan sira ne’ebé la fó ona fuan di’ak hamutuk ektare rihun 8. Husi totál ne’e ami selu ona 40% no agora atu selu tan 60%”, Raimundo Mau informa ba Tatoli, ohin.
Dirijente ne’e relata katak, iha tinan kotuk, dadus hatudu kafé ektare rihun 10 maka atu reabilita, maibé bainhira programa ne’e implementa iha de’it rihun 8 mak presiza duni halo reabilitasaun.
Prosesu verifikasaun hodi halo pagamentu ba faze daruak komesa la’o ona no diretór ne’e espera bele identifika hotu, nune’e bele halo pagamentu. Kafé sira ne’ebé mak reabilita ona no hetan ona pagamentu ne’e nia progresu di’ak loos no hein katak bele fó rezultadu di’ak iha futuru.
Rekorde katak ministériu halo ona identifikasaun ba plantasaun kafé sira iha munisípiu hitu hanesan Aileu, Ainaro, Bobonaro, Ermera, Liquiçá, Manufahi no Manatuto hamutuk ektare 59.921 no rihun 30 maka tenke hetan reabilitasaun, tanba kategoria ninia produsaun ladi’ak ona.
Tuir Programa Nasionál Plantasaun Kafé, Timor-Leste planeia reabilita plantasaun kafé liu ektare rihun 50 até 2030.
Lembra katak Orsamentu Jerál Estadu 2024 ba MAPPF hamutuk $30.694.052. Husi montante ne’e aloka ba progama funsionamentu no dezenvolvimentu institusionál $8.212.465, programa jestaun sustentavel rekursu naturál, utilizasaun no konservasaun $947.552, programa prosesamentu pós-kolleta, armazenamentu asesu ba merkadu no agregasaun $918.280, programa aumenta sustentável produtividade no produsaun $20.615.755
Notísia relevante: Kafé ektare rihun 10 mak presiza hetan reabilitasaun
Jornalista: Tomé Amado
Editora Maria Auxiliadora
