PNTL Viqueque arrekada reseita $2.725 ba kofre Estadu
VIQUEQUE, 01 marsu 2024 (TATOLI)- Polísia Nasionál Timor Timor Leste (PNTL) munisípiu Viqueque liuhusi Unidade Tránzitu, hosi janeiru no fevereiru, konsege arrekada reseita liuhosi taxa infrasaun rodaviáriu hamutuk $2.725 ba kofere Estadu.
“Durante ne’e, husi fulan-rua ne’e ami konsege rekolla koima husi infrasaun ne’ebé komete husi infratór sira iha munisípiu Viqueque hamutuk $2.725 ba kofre Estadu. Nune’e, PNTL sei kontinua esforsu atubele rekolla reseita ba kofere estadu”, Komandante Polísia Nasionál Timor Leste (PNTL) munisípiu Viqueque, Superintendente Antonio Rego Fernandes, relata ba Agência Tatoli, iha kuartel PNTL Viqueque, ohin.
Líder PNTL munisípiu Viqueque ne’e relata, invoce ne’ebé ba infrasaun nian hamutuk 115 ho ninia koima sira-ne’ebé selu ona iha banku maka totál $2.725, invoce infrasaun 3 maka seidauk selu ho montante hamutuk $225.
Asidente Tráfegu
PNTL munisípiu Viqueque rejista asidente tráfegu hahú husi fulan janeiru to’o fevereiru hamutuk kanek kama’an hamutuk 13, kanek todan haat no rejista mate na’in-1 akontesimentu ne’e akontese ho motorizada iha ponte Banglades área Buanurak, suku Uabubu postu Ossu.
“Sei kontinua halo auto stop iha estrada públiku sira liuliu ba motoridade sira-ne’ebé la uza kapasete. Nune’e utilizadór sira-ne’ebé viola regra trazintu maka ami sei fó multa ba abitante sira selu koima hodi fó reseita ba ita-nia Estadu”, nia akresenta.
Enkuantu nia dehan, PNTL liuhusi unidade tranzitu sei kontinua implementa regra sira-ne’e bázeia ba dekretu-lei númeiru 6/2003, públika iha Jornál Repúblika loron 6 fulan Agostu tinan 2003 kona-ba rejime tránzitu Timor Leste Dekretu-Lei.
“Ita-nia sidadaun sira-ne’ebé viola regra tranzitu tenke selu. Tan ne’e, sidadaun sira-ne’e utiliza transporte halo viajen tenke uza kapasete hodi salva vida, maibé halo viajen maka la uza kapaseita tranzitu hetan sei prende hodi selu koima ba Estadu”. Tenik nia.
Jornalista : Vitorino Lopes da Costa
Editór : Florencio Miranda Ximenes
