Autoridade Uatulari no veteranu hamosu inisiativa husu misa agradesimentu bá eroi no mártir
VIQUEQUE, 03 marsu 2023 (TATOLI)-Autoridade postu adiministrativu postu Uatulari, munisípiu Viqueque hamutuk ho veteranu sira inisiativa komemora loron veteranu 03 marsu hodi husu misa agradesementu ba eroi no martir libertasaun pátria.
“Liuhusi misa ida-ne’e ita husu agradesementu ba ita-nia eroi mártir sira-ne’ebé mate ba rai Timór, hodi haraik bensaun ba veteranu sira. Atu na’in Maromak salava sira-nia klamar ba lalehan no fó bensaun veteranu sira-ne’ebé sei moris hetan saúde di’ak,” Padre Simplisius Bau Mali SVD, liuhosi omília iha resintu adiministrasaun postu Uatulari, domingu ne’e.
Pe. Simplisius Bau Mali SVD ne’e fó hanoin katak veteranu sira-nia domin ba rai ida-ne’e boot tebes nune’e sira dedika sira-nia aan tomak ba luta libertasaun nasionál.
“Ita-nia veteranu nia domin ba rai ida-ne’e sira tenke simu konsekuénsia lala’ok funu nian. Iha tempu difisil nian laran ita-nia veteranu sira soe tempu, enerjia, husik família hodi hamrik metin iha sira-nia fatin luta ba ukun rasik aan. Tanba sira hasai sira-nia kosar-been iha tempu luta hasoru invasaun sira. Nune’e ba sarani no povu Uatulari nafatin husu orasaun ba ita-nia éroi sira-ne’e la hamutuk ona ho ita.”
Veteranu sira kontribui rasik osan
Adiministradór postu Uatulari, Manuel do Rosário, haktuir ba komemorasaun ba loron veretaranu ida-ne’e realiza tanba kontribui osan husi veteranu Uatulari hodi selebra loron nasionál hamutuk ho abitante sira iha Uatulari.
“Komemorasaun ba tinan ida-ne’e inisiativa mai husi ami rasik tanba loron nasionál veteranu ne’e importante. Maske Governu la apoiu orsamentu ruma ba ami mós ami veteranu hamutuk kontribui osan hodi selerbra loron ida-ne’e,” nia katak.
Nia relata, komemorasaun ne’e husi kibit vereranu nian balun fó $5 no ida-ne’ebé kbiit natoon kontrubui $10 nune’e osan hamutuk $10 nune’e osan kontribui husi veteranu Uatulari totál hamutuk $1.407.
“Ámbitu komemorasaun ne’e ami veteranu hakarak husu joven sira tenke tau importánsia ba estudu hodi aban bainrua bele kontinua ami. Tanba ami kontinua sira-ne’ebé mate ona nune’e jerasaun foun sira prepara-aan hatutan ami-nia servisu,” nia enkoraja joven sira.
Iha komemorasaun ne’e, veteranu sira organiza estudante sira marsa ho lilin no ai-funan husi suku Macadique to’o uma mahon iha resintu postu adiministrativu Uatulari hodi fó sentida omenajen ba mártir libetasaun sira. Hafoin marsa to’o iha resintu postu adiministrativu Uatulari kontinua ho misa agradesimentu ba eroi mártir sira no fó bensaun ba lilin no ai-funan.
Hafoin misa ramata autoridade lokál, veteranu no abitante sira iha postu Uatulari kontinua kari ai-funan iha kruz boot, iha uma mahoin restu mortál ba mártir sira iha postu Uatulari.
Jornalista:Vitorino Lopes da Costa
Editór : Evaristo Soares Martins
