Veteranu sira tenke kontinua kontribui bá dezenvolvimentu iha Viqueque
VIQUEQUE, 03 marsu 2024 (TATOLI)–Prezidente Autoridade munisípiu Viqueque, Januário Soares “Bolly”, husu veteranu sira kontinua kontribui ba prosesu dezenvolvimentu ne’ebé iha munisípiu Viqueque tanba veteranu maka nu’udar ai-rin ba nasaun Timor Leste.
“Ita-nia nasaun hetan independénsia tanba esforsu husi ita-nia veteranu kombatente sira. Tanba ne’e, sira maka funu nain ba ukun-aan no ai-rin ba nasaun Timor Leste. Maske ita hetan ona ukun rasik aan, maibé husu nafatin ita-nia veteranu sira tenke kontribui ba prosesu dezemvolvimentu liuliu iha munisípiu ida-ne’e,” Januário Soares “Bolly”, hateten ba jornalista sira, hafoin hasa’e bandeira iha komemorasaun 03 marsu, loron masionál ba veteranu sira, domingu ne’e.
Autoridade Viqueque ne’e dehan, veteranu sira-ne’ebé sei moris povu nafatin husu sira-nia tulun hodi sira fó sira-nia apoiu hamutuk ho povu hadi’a nasaun ida-ne’e.
“Dala barak ema dehan ita-nia veteranu sira maka halo impedimentu ba dezenvolvimentu iha nasaun laran, maibé ha’u hanoin Timor Leste ukun an ne’e veteranu sira mós moris di’ak, maibé agora ita-nia veteranu sira-nia moris sei susar tanba ne’e maka sira hakarak partisipa ba dezenvolvimentu. Kondisaun maka seidauk di’ak hodi akomoda ema hotu ba iha prosesu dezenvolvimentu liuliu partisipasaun projetu sira. Entaun dala barak sempre dún malu dehan veteranu sira maka halo impedimentu, ida-ne’e ha’u hanoin laloos,” nia subliña.
Nune’e ba komemorasaun ida-ne’e nia fó hanoin fali katak oras-ne’e veteranu barak maka seidauk hetan pensaun tanba sei iha prosesu verifikasaun.
Prezidente Konsellu Kombatente Libertasaun Nasionál (CCLN, sigla portugés) munisípiu Viqueque, Adriano da Camara ‘Lentil’, haktuir loron 03 marsu nu’udar loron ne’ebé espesial liu ba veteranu sira nune’e serimónia ida-ne’e veteranu sira tenke partisipa hodi relembra ikas loron reorganiza estutura Maubai (Viqueque) 1981.
“Loron ida-ne’e sai espesial liu ba veteranu sira, nune’e ba komemorasaun loron veteranu nian ne’e. Ha’u husu veteranu sira tenke partisipa nu’udar loron istóriku ba nasaun Timor Leste,” Lentil sujere.
Lentil fó hanoin, veteranu nu’udar órgaun independente ida iha nasaun Timor Leste hodi akumula ema hotu hodi partisipa ba prosesu dezenvolvimentu, veteranu tenke ajuda Governu no Estadu.
Nia rekoñese katak veteranu barak maka estadu rekoñese no veteranu balun maka oras ne’e sei iha prosesu verifikasaun nune’e nafatin hein hodi hetan rekoñese hosi estadu Timor Leste.
Jornalista: Vitorino Lopes da Costa
Editór : Evaristo Soares Martins
