Deputadu KHUNTO husu MJ renova estudante timoroan nia pasaporte kaduka
DILI, 04 marsu 2024 (TATOLI)—Deputadu hosi bankada KHUNTO, Luis Roberto husu Ministériu Justisa (MJ) liuhosi Dirasaun Serbisu Rejistu Notariadu atu dezloka ba Filipina hodi bele renova estudante hamutuk 40-resin ne’ebé ninia pasaporte kaduka ona.
“Ita-nia estudante sira kuaze 40-resin iha Filipina ne’ebé mak sira mensajen mai ha’u, katak sira-nia pasaporte kaduka hotu ona. Ne’ebé husu Ministériu Justisa ho nia ekipa bele ba to’o iha ne’eba para hodi bele renova sira-nia pasaporte,” Deputadu Luis Roberto levanta iha reuniaun plenária PN, segunda ne’e.
Nia apresia MJ ninia ekipa ne’ebé foin daudaun ba iha Portugál hodi renova pasaporte estudante sira iha ne’eba no diplomátiku sira.
Tanba ne’e, nia husu oinsá ekipa ne’e atu bele to’o iha Filipina hodi atende estudante timoroan sira iha ne’eba, tanba sira lebele fila mai tanba ho kestaun estudu.
Vise Ministru ba asuntu Parlamentár, Adérito Hugo da Costa, rejista preokupasaun ne’e no sei enkamiña ba entidade relevante.
Jornalista : Nelson de Sousa
Editór : Cancio Ximenes
