iklan

COVALIMA

Jogu bola guling perturba komunidade iha tempu kalan

Jogu bola guling perturba komunidade iha tempu kalan

Fatin ka kuadru ba jogu bola guling. Imajen Tatoli/Celestina Teles.

COVALIMA, 04 marsu 2024 (TATOLI) –  Jogu tradisionál bola guling iha bairru Cendana, iha suku Debos, Covalima preokupa komunidade tanba perturba sira iha tempu kalan, liuliu alunu sira difísil atu estuda tanba barullu.

Abitante Bonifácio Goveia Mali sujere bainhira loke atividade ne’e labele besik komunidade nia hela fatin, nune’e labele interompe sira, tanba jogu ida ne’e la motiva joven sira hanoin atu buka serbisu.

“Ami la bandu atu loke jogu tradisionál bola guling, maibé loke besik komunidade tanba iha tempu kalan ami labele deskansa no ami-nian oan sira mós labele estuda, tanba sira loke kuluna halo barullu”, Bonifácio Mali lamenta, ohin.

Ho kestaun ne’e mak nia husu ba Komandu Polísia Nasionál Timor-Leste (PNTL) Covalima atu kontrola, nune’e bainhira loke atividade jogu tradisionál bola guling labele halo barullu para ema bele deskansa iha tempu kalan.

Komandante PNTL Covalima, Superintendente polísia Calisto Gonzaga mós rekoñese katak jogu  bola guling halo komunidade sira deskansa ladi’ak.

“Ha’u tenta atu bolu sira no tenke bandu labele halo distúrbiu bainhira ema deskansa iha kalan, tanba autorizasaun ba to’o tuku 12 kalan, konserteja labarik no idozu sira presiza deskans. Iha tempu badak sei bolu empreza sira ne’ebé loke jogu taradisionál bola guling atu fó hanoin nune’e evita atu halo barulli”, dehan.

Iha Covalima eziste jogu bola guling iha bairru Legore, Mata-air no Cendana Satu, iha postu Suai.

Notísia relevante: Autoridade Covalima husu PNTL kontrola jogu ilegál

Editora: Maria Auxiliadora

iklan
iklan

Leave a Reply

iklan
error: Content is protected !!