MESSK-UNTL asina nota entendimentu ba implementasaun baze dadus ensinu superiór
DILI, 04 marsu 2024 (TATOLI)—Ministériu Ensinu Superiór Siénsia no Kultura (MESSK) ho Universidade Nasionál Timor Lorosae (UNTL), segunda ne’e, asina nota entendimentu ba implementasaun sistema baze dadus iha ensinu superiór 13 iha Timor-Leste.
“Ami halo nota entendimentu ida ho UNTL atu estabelese ami-nia baze de dadus ba ensinu superiór. Ita iha ona ensinu superiór neen (UNTL, DIT, IOB, São José de Brito, Canosa, Institutu Superior Cristal), no tinan ne’e mak UNTL ajuda estabelese tan ba ensinu superiór 13. Entaun tinan 2024 ne’e ita kompleta ona baze dadus iha ensinu superiór sira,” Ministru Ensinu Superiór Siénsia no Kultura (MESSK), José Honório Jerónimo, hateten ba jornalista sira, hafoin asina MoU ho UNTL, atu salaun MESSK, Colmera, Dili.
Governante ne’e esplika katak baze dadus ne’e importante tanba bainhira ema loke baze dadus ema bele hatene katak universidade, institutu, kursu no fakuldade hira mak iha Timor-Leste.
Objetivu implementa baze dadus ne’e, nia hateten, atu kontrolu dosente ho lisensiatura hanorin estudante iha universidade sira no mós estudante ne’ebé halo plajiadu.
“Ita tau ida-ne’e para hatene, estudante labele halo plajiadu ba ema-nia monografia. Ezemplu iha UNTL foti UNPAZ hakerek no iha UNPAZ ba hakerek iha UNDIL,” nia dehan.
Sira-ne’ebé seidauk mak Universidade Oriental Timor Lorosa’e (UNITAL), Universidade da Paz (UNPAZ), Institutu Boaventura Timor-Leste (IBTL), Institutu Politéniku Betano (IPB) no seluk tan.
Governante ne’e hatutan, iha 2024 kompleta hotu ona, atu nune’e informasaun ba públiku katak Timor-Leste iha ensinu superiór 19.
“Tinan barak ita laiha baze dadus, ita laiha mós baze ensinu superiór maibé ita agradese tanba iha semana tolu liubá aprezenta ona lei baze ensinu superiór. Ha’u tempu badak UNTL sei lori tan estatutu UNTL nian ba. Nune’e, ohin, asina nota entendimentu ne’e atu fó hela kna’ar ba UNTL, Fakuldade Enjenária, liuliu Pro-Reitór ne’ebé ko’alia kona-ba IT nian, ne’ebé servisu hamutuk ho tékniku MESSK iha Dirasaun teknolojia hodi kompleta baze dadus iha 2024 ne’e. Ohin, ita asina nota no aban ita sei tun ba institutu ida-ida rekolla dadus. Ita tun rekolla fazeadamente, la’ós tun dala ida kobre hotu, lae,” nia hateten.
Diretora Jerál MESSK, Filomena Maria Lay, hateten, proposta ne’ebé UNTL iha mak rihun $120-resin.
“Osan rihun$120-resin ida-ne’e atu jere dadus maibé sei mós osan ba ekipamentu ida-ne’ebé atu estabelese iha Ministériu. Maibé ba Instituisaun neen ne’ebé estabelese ona ne’e hamutuk rihun $90. Ba institutu 19 ho nia totál orsamentu $150.000,” nia dehan.
Reitór UNTL, João Martins, hateten ohin asina nota entendimentu hodi implementa baze dadus. Tanba baze dadus bele útil ba Governu hodi kontrola.
“Ita fó uluk ba fakuldade agrikultura, filozofia, no direitu. Antes ne’e Fakuldade Enjenária implementa ona nune’e ita alarga no espande iha fakuldade hotu-hotu iha UNTL. Tinan oin alarga ba Medisina, Edukasaun, no Siénsia Ezata nian,” nia hateten.
Jornalista : Osória Marques
Editór : Cancio Ximenes
