Meza PN baixa projetu-lei mandatu titulár ba komisaun A
DILI, 04 marsu 2024 (TATOLI)—Meza Parlamentu Nasionál (PN) liuhosi reuniaun plenária PN, segunda ne’e, anúnsiu admisaun no baixa ba komisaun A trata asuntu Justisa no Konstituisionál ba Projetu-Lei númeru 6/VI(1a)-Mandatu titulár ou membru órgaun designadu hosi Parlamentu Nasionál hodi bele fó apresiasaun inisiál.
“Anúnsiu baixa ba komisaun asuntu Konstituisionál no Justisq ba projetu-lei 6/VI(1a)-Mandatu titular ou membru órgaun designadu husi Parlamentu Nasionál,” Prezidente Parlamentu Nasionál, Maria Fernanda Lay, hato’o iha sala plenária PN.
Nia hateten, baixa ba komisaun A hodi trata inisiativa projetu-lei ne’e, tanba iha lei balun ne’ebé PN haluha tiha prosedimentu oinsá mak ezekuta lei.
Prezidente PN ne’e seidauk esplika konteúdu projetu-lei ne’e tanba sei halo uluk apresiasaun inisiál hosi komisaun nian.
Nune’e, ba oin, komisaun sei tau ajenda hodi halo audiénsia públika ho parte relevante sira hodi fó sira-nia hanoin ba projetu-lei refere, hafoin sei halo relatóriu paresér ba meza PN hodi diskute kontinua iha faze jeneralidade no espesialidade.
Jornalista : Nelson de Sousa
Editór : Cancio Ximenes
