Reprezentante povu husu estabelese serbisu DNTT iha Ermera
DILI, 04 marsu 2024 (TATOLI)—Deputadu hosi bankada CNRT iha Parlamentu Nasionál (PN), Marcos Soares Martins, husu ba Ministériu Transporte no Komunikasaun (MTK) atu estabelese servisu Dirasaun Nasionál Transporte Terrestre (DNTT) iha munisípiu Ermera.
“Husu ba Ministériu Transporte no Komunikasaun (MTK) atu sentru DNTT iha munisípiu Ermera no munisípiu sira-ne’ebé sai hanesan pilotu ba implementasaun polítika desentralizasaun, atu nune’e fasilita ita-nia povu sira bele trata sira-nia dokumentu transporte iha ida-idak nia munisípiu,” Deputadu ne’e hato’o liuhosi reuniaun plenária PN, segunda ne’e,
Tanba ida-ne’e, tuir nia, sai hanesan input ba munisípiu ne’ebé mak agora halo preparasaun ba implementa polítika desentralizasaun, aleinde tanba Ermera tuir dadus ne’ebé iha katak motor iha ona 6678 no karreta rihun rua.
“Tanba ne’e, ami husu hanesan input Ermera nian, nune’e bele jere munisípiu ne’e la’o ba oin,” Deputadu Ermera-oan ne’e hato’o.
Vise Ministru ba asuntu Parlamentár, Adérito Hugo da Costa, rejista asuntu ne’e no sei enkamiña ba entidade relevante.
Jornalista : Nelson de Sousa
Editór : Cancio Ximenes
