VIQUEQUE, 05 marsu 2024 (TATOLI)-Sekretáriu Ezekutivu Konsellu Konsultivu Libertasaun Nasionál (CCLN-sigla Portugés), munisípiu Viqueque, Daniel Sarmento “Fogete”, husu kombatente no veteranu nia oan sira iha munisípiu Viqueque atu konkorre ba konkursu bolsa Estudu.
“Ohin, ami hahú simu ona dokumentu hosi estudante veteranu oan sira ne’ebé hakarak konkorre ba vaga bolsa estudu ida-ne’e. Nune’e ha’u husu ba veteranu Viqueque-oan sira aproveita oportunidade ida-ne’e tanba Governu oferese ba veteranu-oan sira”, hateten Daniel Sarmento, ba Agência Tatoli, iha nia kna’ar fatin Viqueque Vila, ohin.
Konkursu ne’e ba ema na’in-100 kompostu hosi ensinu báziku vaga lima, segundu no terseiru siklu 15, sekundáriu 25, universidade rai laran na’in-50 no universidade rai li’ur na’in-lima.
Prosesu rejista ba konkursu ne’e ho kritéria hanesan kandidatu ne’ebé ho idade 17 ba leten tenke lori kartaun eleitorál, Billete Identidade (BI), deklarasaun husi eskola, aprezenta valór tinan 2023 orijinál, sertidaun no konta bankaria.
“Vaga ne’e veteranu-oan sira barak maka konkerre no sei haree fila-fali estudante sira-nia valór ne’ebé boot hafoin asesu ba vaga refere”, nia afirma.
Kona-bá veteranu no kombatente ne’ebé sei iha prosesu verifikasaun nia oan seidauk bele konkorre tanba konkursu ne’e ba kombatente sira-ne’ebé hetan ona pensaun veteranu hanesan 8 a 14, 15 a 19, 20 a 24 .
Iha tinan 2023, veteranu Viqueque-oan na’in-271, maibé vaga ne’e presiza de’it 165, ne’ebé asesu ba universidade rai laran 70, universidade rai li’ur na’in-lima, sekundáriu na’in-50 no segundu no terseiru síklu 30, primeiru síklu na’in-10.
Tuir konkursu bolsa Estudu 2024 ba munisípiu Viqueque hamutuk 100 ba ensinu báziku vaga lima, segundu no terseiru siklu 15, sekundáriu 25, universidade rai laran na’in-50 no universidade rai liur na’in-lima.
Jornalista : Vitorino Lopes da Costa
Editór : Florencio Miranda Ximenes
