Gregório Saldanha: Serbisu Komité 12 Novembru kotinua la’o normál
DILI, 05 marsu 2024 (TATOLI)—Prezidente Autoridade Munisípiu Dili, Gregório Saldanha, informa, serbisu Komité 12 Novembru kontinua la’o normál tanba iha membru sira atu lidera serbisu ne’e la’o ba oin.
“Komité 12 Novembru ne’e serbisu la’o normál nafatin bainhira ha’u mai asume kargu hanesan Prezidente Autoridade Munisípiu Dili tanba ami-nia kolega sira iha ne’ebá atu lidera. Ezemplu, ha’u ba fatin ruma, ha’u delega mandatu kompeténsia ba membru sira atu lidera servisu ne’e,” Gregório Saldanha hateten ba TATOLI, foin lalais ne’e.
Nia esplika, daudaun ne’e asume kargu hanesan PAMD mantein konsentra serbisu munisípiu nian tanba servisu Komité 12 Novembru ema barak iha atu lidera.
“Ha’u nafatin fó atensaun ba buat ne’ebé mak bele halo tanba, tinan barak ona lidera iha Komité 12 Novembru. Entaun, agora ha’u presiza haree fali buat seluk tanba Estadu fó fiar ona ha’u tenke serbi servisu munisípiu. Maibé, ha’u la haluha Komité 12 Novembru tanba komité ne’e ita hotu nian,” nia informa.
Tuir Konstituisaun, determina katak Estadu tenke asegura protesaun espesiál ba mutiladus funu, oan-ki’ak ho sira ne’ebé dependente hela ba ema sira ne’ebé dedika sira-nia moris tomak iha Luta ba Independénsia no soberania Nasionál no proteje ema hotu-hotu ne’ebé partisipa iha rezisténsia hasoru okupasaun estranjeira.
Lei mós define tiha ona mekanizmu hodi fó omenajen ba Eróis Nasionál sira. Nune’e, Governu sei kontinua rekoñese valór ne’ebé aas tebes husi Eróis Nasionál sira, sei prezerva no selebra memória kona-ba Luta no sei halo buat hotu (ka providensia) atu sira hotu ne’ebé simu sakrifísiu tomak hodi alkansa bein-komún (ka hotu-hotu nia di’ak), bele moris, agora, ho kondisaun ne’ebé dignas, tanba País nia dignidade rasik mós depende ba ida ne’e.
Jornalista : Felicidade Ximenes
Editór: Rafael Ximenes de A. Belo
