iklan

COVALIMA, HEADLINE

Alfándega Mota-Masin halo apreensaun ba produtu importadu ne’ebé laiha lisensa  

Alfándega Mota-Masin halo apreensaun ba produtu importadu ne’ebé laiha lisensa  

Alfándega Mota-Masin halo apreensaun ba produtu importandu ne’ebé laiha lisensa . Imajen/Celestina Teles.

COVALIMA, 06  marsu 2024 (TATOLI) – Autoridade Aduaneira (AA) ka Alfándega Mota-Masin halo apreensaun ba sasán kontrabandu no la’ós kontrabandu ne’ebé importa husi empreza Nagamas Jaya, iha pontu entrada fronteira Mota-Masin, iha postu Tilomar, munisípiu Covalima.

Diretór Alfándega Mota- Masin, Nuno Nogueira, informa katak funsionáriu AA halo apreensaun bainhira halo ezaminasaun ba kamioneta ne’ebé tula sasán la’ós kontrabandu hanesan bebida Coca Cola kaixa 1.459,  Kiko kaixa 100, Kratingdaeng kaixa 200, ne’ebé la hakerek iha lista kompra nian.

Alfándega mós halo apreensaun ba sasán kontrabandu mak hanesan Tabako karón 54  tanba viola Dekretu lei-númeru 14/2016 kona-ba Rejime Kontrolu Tabaku, tanba iha artigu 9 no 10 hatete katak Tabako ne’ebé atu importa mai Timor-Leste tenke hetan autorizasaun husi Ministériu Saúde.

Empreza Nagamas Jaya mós importa ai-moruk OBH, Ibuprofen, Paracetamol kaixa 10 ne’ebé laiha lisensa husi Ministériu Saúde. Aleinde ne’e, hatama mós kilat manu musan falun 250 no plástiku karón 26 ne’ebé laiha autorizasaun husi parte Ambiente.

“Alfándega halo apreensaun ba sasán sira ne’e iha loron 27 fevereiru no finaliza ona identifikasaun ba produtu sira Daudaun, sasán refere rai hela iha armazein Alfándega hodi halo prosesu submisaun dokumentu hodi hein paresér no despaixu ba iha nasionál hodi aplika taxa bazeia ba lei”, Nuno Nogueira hatete ba Tatoli, ohin.

Taxa impostu seletivu konsumu no direitu aduaneiru ba importasaun ne’ebé Nonu Governu altera iha inísiu tinan ne’e ba fali taxa anteriór husi 5% tun ba 2,5%. Governu introdús programa ne’e tanba hakarak hamenus impaktu inflasaun no aumentu kustu vida ba sidadaun sira, nune’e bele aumenta kapasidade kompra.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!