DILI, 06 marsu 2024 (TATOLI) – Autoridade Protesaun Sivíl (APC) no operadora telekomunikasaun Timor Telecom asina akordu patrosíniu ba períodu tinan ida hodi fortalese kooperasaun atubele divulga informasaun ba kliente rihun 400-resin iha territóriu kona-ba dezastre naturál sira.
“Ita hakarak atu disemina mós informasaun ba populasaun sira kona-ba problema dezastre naturál ne’ebé akontese iha territóriu, liuhusi pakote SMS ba kliente rihun 400-resin ne’e uza simcard TT”, Sekretáriu Estadu Protesaun Sivíl (SEPS), Domingos Mariano Reis, hatete iha marjen asinatura akordu patrosíniu iha edifísiu APC Caicoli, ohin.
Sekretariu Estadu apresia tebes ba kontribuisaun TT nian ne’ebé ho vontade tomak hakarak kontribui ba dezenvolvimentu Timor-Leste nian. Tuir nia, ida ne’e parte ida importante loos atu ajuda APC bele divulga informasaun ba populasaun sira, liuliu kliente sira ne’ebé mak uza kartaun TT.
Governante ne’e relata katak informasaun ne’ebé empreza TT sei divulga ba kliente sira ne’e sei simu husi APC. Bainhira iha ona previzaun tempu ba mapeamentu risku dezastre nian maka APC hato’o ba TT iha tempu ne’e hodi sira fahe inforasaun ba kliente sira hotu.
Domingos Mariano Reis espera katak bainhira kliente sira simu ona informasaun kona-ba risku dezastre naturál sira atu akontese iha fatin ne’ebé de’it no sira lee ona mensajen maka bele kuidadu sira-nian aan hodi evita risku sira, nune’e labele fó ameasa ba sira-nian vida.
Tuir governante, akordu ne’e rasik konsidera sei halo poupasaun ba despeza Estadu hodi garante sustentabilidade ba dezenvolvimentu país nian. Akordu ne’e ninia durasaun fulan 12, depois tinan ida tiha maka sei haree fali kontratu ne’e, karik pesiza atu kontinua maka bele renova.
Diretór Jurídika no Relasaun Institusionál Timor Telecom, Manuel Cárceres, realsa akordu ne’ebé TT halo ho APC ne’e tama iha enkuadramentu responsabilidade sosiál empreza nian. Kooperasaun ida ne’e halo atu uza meiu TT nian hodi disemina informasaun sira kona-ba dezastre naturál, kona-ba meteorolojia no servisu APC nian ba kliente sira.
“Dezastre naturál ne’e atu akontese iha ne’ebé kliente TT bele hatene, nune’e sira bele halo prevensaun kedan. Ha’u fi’ar katak iformasaun ne’ebé maka ita sei fó liuhusi SMS ne’e ita-nian kliente ativu rihun 400-resin bele asesu. Liuhusi polítika ne’ebé APC kria ne’e bele ajuda ita-nian populasaun sira iha territóriu”, nia garante.
Akordu kooperasaun ne’e asina husi Prezidente Autoridade Protesaun Sivíl, Ismael da Costa Babo, no Diretór Jurídiku no Relasaun Institusionál TT, Manuel Carceres, no hetan prezensa husi Sekretáriu Estadu Protesaun Sivíl no funsionáriu sira.
Jornalista: Tomé Amado
Editora: Maria Auxiliadora
