DILI, 06 marsu 2024 (TATOLI)—Estudante ekivalénsia faze V (cinco) hanesan Ema ho Defisiénsia (EhD) iha Sentru Komunitária Aprendizajen (SKA) postu Cristo Rei Creativo, Octávio de Jesus, husu Governu atu apoiu mós merenda eskolár ba sira.
Notísia Relevante: SKA Cristo Rei Creativo menus sala-de-aula difikulta prosesu aprendizajen
“Ami iha ekivalénsia ne’e mós kuandu iha eskola formál karik ensinu báziku, tanbasá mak mai labele asesu ba merenda eskolár no eskola formál sira seluk hetan fali. Ami husu tanba ami mós hola parte rai ida-ne’e. Mezmu ami defisiénsia maibé labele diskrimina ami,” nia hateten ba Agência Tatoli iha edifísiu Asosisaun Defisiénsia Timor-Leste (ADTL), Mascarenhas, kuarta ne’e.
Nia dehan, ba estudante sira-ne’ebé asesu iha eskola formál ne’e hela ho sira-nia inan-aman enkuantu estudante espesiál Ema ho Defisiénsia (EhD) ne’e maiória hela iha kost (uma aluga) no hela asrama Manleuana mak mai tuir aprendizajen ne’e.
“Tanba ne’e, ha’u rekomenda Governu atu fasilita merenda eskolár ba ami ema ho defisiénsia sira tanba ami barak mak hela iha asrama no iha ami balun ne’ebé hela kost. Depois, ami-nia aula ho oras normál ne’e oras rua maibé ho ami ema ho defisiénsia oioin, entaun manorin presiza oras tolu to’o haat mak bele hanorin ami ho di’ak,” nia rekomenda.
Profesora Ekivalénsia Sentru Komunitáriu Aprendizajen (SKA) postu Cristo Rei Creativo, Margareta Soares, hatutan tuir loloos ne’e Governu mós tau planu ba eskola ekivalénsia sira, tanba sira kuandu kompara ho eskola formál ne’e hanesan ensinu báziku, tanba ne’e sira mós iha direitu ba asesu ba merenda eskolár.
“Ha’u atu rekomenda de’it bai ta-nia Estadu ne’e katak, ekivalénsia ne’e iha ema defisiénsia mós ne’ebé iha ne’e hamutuk 18. Sira ne’e presiza duni ita-nia tulun tanba hela kost. Bainhira hamlaha no hamrook, kuitadu osan ne’ebé mak sosa hodi han no hemu,” nia dehan.
Totál estudante ekivalénsia hosi 2015 to’o agora ne’e hamutuk 392, ne’ebé kompostu hosi feto 283 no mane 109 no estudante ba tinan 2024 ne’e ho totál hamutuk 163, inklui ona ho ema defisiénsia.
Governu estabelese Sentru Komunitáriu Aprendizajen (SKA) iha Timor-Leste ne’e hamutuk 15 ho nia estudante hamutuk 1.509 no númeru ne’e la inklui ho tinan 2024 nian.
Jornalista : Osória Marques
Editór : Cancio Ximenes
