Governu aloka millaun $3.6 implementa projetu komunitária-22 iha 2024
DILI, 06 marsu 2024 (TATOLI)—Diretór Nasionál Infraestrutura Bázika iha Ministériu Edukasaun (ME), Hélio Lopes, hateten tinan ne’e Governu aloka osan millaun $3.6 hodi implementa projetu komunitária hamutuk 22 iha munisípiu 12.
Notísia Relevante: MEJD sei kontinua projetu komunitária 117 iha edukasaun pre-eskolár
“Ba tinan ne’e, ita sei ezekuta orsamente ne’e ba projetu komunitária ne’e,” Diretór Nasionál ne’e hateten ba Agência Tatoli, iha Ministériu Solidariedade Sosiál no Inkluzaun (MSSI), Caicoli, kuarta ne’e.
Projetu komunitária hamutuk 22 ne’e maiória ba eskola pre-eskolár hamutuk 11, eskola ensinu báziku kuaze 10 no restante ne’e eskola ensinu sekundáriu tékniku vokasionál nian.
“Eskola hirak-ne’e depois ita ba haree nia kondisaun grave tebes no ida-ne’e ita halo ba emerjénsia hodi presiza halo atendimentu liuhosi konstrusaun ne’e, nune’e bele solusiona. Agora projetu ba tinan ne’e ita halo reabilitasaun ba eskola iha eskola ensinu Sekundáriu Tékniku Vokasionál Dotik, mak reabilitasaun ba sira-nia dormitóriu, kuziña, no seluk fali ita halo konstrusaun foun ba sala-de-aula inklui konstrusaun moru protesaun,” nia dehan.
Ba tinan 2023 nian, nia hateten, projetu komunitária ne’e hamutuk 114 ho nia orsamentu millaun $10.5, ne’ebé nia faze ezekusaun fíziku foin mak atinje 25%.
Mezmu foin mak atinje 25%, maibé garante katak sei finaliza iha tinan ne’e, no hosi projetu 114 ne’e hahú hosi eskola pre-eskolár to’o eskola ensinu sekundáriu jerál no tékniku vokasionál.
“Pursentu kiik tanba ninia realizasaun tarde iha momentu ne’ebá no kontratu ne’ebé VIII Governu fó ba projetu ne’e iha fulan-setembru no outubru 2023 nia rohan. Entaun, nia pursentu kiik maibé ita garante sei finaliza iha tinan ne’e.” nia hateten.
Kona-ba eskola rekorrente nian, dirijente ne’e dehan, ba tinan ne’e seidauk iha fundu maibé Ministériu Edukasaun (ME) iha ona planu atu tau iha orsamentu tinan 2025 nian.
“Ita sei haree hotu prioridade mak ida-ne’ebé mak depois mak ita tau nia orsamentu hodi halo konstrusaun no rehabilitasaun inklui ensinu rekorrente sira,” nia dehan.
Planu tau orsamentu ba tinan 2025 nian ne’e, Ministériu Edukasaun liuhosi nia dirasaun infraestrutura sei halo monitorizasaun ba eskola ekivalénsia sira, hafoin sei haree ensinu rekorrente nia fatin iha ne’ebé maibé iha balun ita la presiza halo.
“Sira bele uza sala-de-aula ba eskola nia edifísiu ne’ebé eziste hela. Nune’e, depois eskola mak halo jestaun, iha alternativu barak m k ita bele halo,” nia esplika.
Jornalista : Osória Marques
Editór : Cancio Ximenes
