iklan

COVALIMA, HEADLINE

Konsellu Veteranu loke inskrisaun ba kombatente nia oan sira asesu ba bolsa estudu

Konsellu Veteranu loke inskrisaun ba kombatente nia oan sira asesu ba bolsa estudu

Tékniku halo atendimentu ba veteranu nia oan submete dokumentu asesu ba bolsa estuda. Imajen/Celestina Teles.

COVALIMA,  06  marsu  2024 (TATOLI) – Konsellu Munisipál Kombatente Libertasaun Nasionál (CMCLN, sigla portugés) loke onainskrisaun ba kombatente no mártir nia oan sira atu asesu ba bolsa estudu iha tinan letivu 2024.

“Ita hahú halo atendimentu ba bolsa estudu ba veteranu no mártir nia oan sira, la’ós iha Covalima deit, maibé fó oportunidade ba veteranu no mártir nia oan iha territóriu”, Sekretáriu-Ezekutivu CMCLN, Manuel Henrique Barreto ‘Fitun’, informa iha Tabakolot, ohin.

Atribuisaun bolsa estudu ne’e bazeia ba dekretu-lei númeru 8/2009, 15  janeiru, kona-ba rejime atribuisaun bolsa estudu ba kombatente no mártir libertasaun nasionál nia oan sira.

Manuel Henrique Barreto esplika katak bolsa estudu ne’e fó oportunidade ba mártir no veteranu nia ona ne’ebé ho grau 8 a 14 ne’ebé kada munisípiu nia kandidatura na’in-105, kompostu husi estudante primeiru siklu na’in-5, segundu no terseiru siklu 15, ensinu sekundáriu 25, ensinu superiór iha rai-laran 50 no ensinu superiór rai-li’ur lima.

Kritériu ba kandidatu bolseiru foun presiza dokumentu sira hanesan formuláriu rekerimentu bolsa estudu, fotokópia kataun eleitorál husi kandidatu, billeti identidade, sertidaun RDTL ka batizmu orijinál husi kandidatura, dokumentu ne’ebé komprova aproveitamentu eskolár husi kandidatu iha tinan letivu 2023, rezultadu eskolár ida-idak hanesan fotokópia kaderneta eskolár no konta bankária husi kandidatu bolsa estudu.

Rekizitu ba kandidatu sira ne’ebé antes ne’e simu ona bolsa presiza lori dokumentu hanesan formuláriu rekerimentu bolsa estudu,  fotokópia kartaun eleitorál husi kandidatu, billete indentidade, sertidaun RDTL ka batizmu, dokumentu komprova kandidatu matríkula eskolár ba tinan letivu 2024 orijinál,  dokumentu ne’ebé  komprova aproveitamentu eskolár husi  kandidatu iha tinan letivu 2023 ho rezultadu eskolár ida-idak hanesan fotokópia kaderneta eskolár  no  konta bankaria husi kandidatu. Kandidatu bolsa estudu submete dokumentu iha loron 05 marsu no sei remata iha 03 abríl 2024.

“Tékniku sira simu ona veteranu no mártir nia oan na’in-ualu ne’ebé mak submete ona sira-nia dokumentu atu asesu bolsa estudu”, dehan.

Veterana Verónica de Jesus apresia ba programa Governu ne’ebé kada tinan fó oportunidade ba kombatente libertasaun nasionál nia oan sira atu asesu ba bolsa estudu hahú husi primeiru siklu to’o ensinu superiór iha  rai-laran no li’ur.

“Ha’u husu ba vateranu no mártir nia oan sira tenke aproveita oportunidade ho di’ak hodi kontinua hatutan ami-nian luta ba ukun rasik-aan liuhusi edukasaun, tanba edukasaun mak sai xave ba dezenvolvimentu”, apela .

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!