DILI, 06 marsu 2024 (TATOLI) – Diretór Jerál Juventude iha Ministériu Juventude, Desportu, Arte no Kultura (MJDAK), David Tomas de Deus, informa, iha tinan rua ba kotuk Governu liu hosi Sekretáriu Estadu Juventude no Desportu (SEJD) asina akordu ho Planu Dezenvolvimentu Suku (PNDS) hodi konstrui kampu futeból hamutuk ualu iha suku ualu kuaze finaliza ona.
“Iha tinan rua ba kotuk ita koopera ho PNDS atu kolabora iha kestaun tékniku atu hamutuk bele konstroi kampo futeból hamutuk ualu, iha Suku ualu iha Munisípiu neen, hosi servisu hamutuk kampu ualu kuaze balun finaliza ona balun seidauk,” Diretór ne’e katak ba Agência TATOLI iha edifisiu MJDAK-Dili, kuarta ne’e.
Durante kooperasaun , nia dehan PNDS fó apoiu maka’as ba dezeñu no levantamentu dadus no orsamentu Governu entrega direta ba Suku mak ka’er hodi jere.
“Ita servisu hamutuk ho PNDS orsamentu ita la fó ba sira, sira fó apoiu ba dezeñu no levantamentu dadus iha terenu. Osan ita fó ba suku sira bazeia ba sira nia proposta haruka mai Governu, entaun osan ita aloka ba sira mak halo servisu,” nia katak.
Suku ualu ne’ebé benefisia ba apoiu ne’e mak hanesan suku Ritabou, Postu Administrativu Maliana, Munisípiu Bobonaro, Suku Aidabaleten, Postu Administrativu Atabae Munisípiu Bobonaro, Suku Watuhako Postu Administrativu Venilale Munisípiu Baucau, Suku Laisorulai Postu Administrativu Quelicai Munisípiu Baucau.
Alende ne’e, Suku Fatubesi Munisípiu Ermera, Suku Manlala Postu Administrativu Soibada Munisípiu Manatuto, Suku Afaloicai Postu Administrativu Uatulari Munisípiu Viqueque no Suku Mahaquidan Postu Administrativu Alas Munisípiu Manufahi.
“Kampu sira ne’e iha Ritabou nian halo kampu multifunsaun, Atabae ita halo kampu multifunsaun, Venilale ita halo kampu futeból, Laisorulai ita halo kampu futeból Fatubesi ita halo kampu futeból, Manlala ita halo rua multifunsaun no kampu futeból, Viqueque no iha Mahaquidan Manufahi ita halo kampu futeból,” nia hatete.
Tuir relatóriu ba progresu kampu ualu ne’e, Diretór David informa, kampu neen mak finaliza no rua mak sei iha prosesu konstrusaun mak hanesan Ritabou no Manlala.
“Kampo ualu ne’e neen konsege finaliza ona, maibé rua mak seidauk finaliza hanesan Ritabou no Manlala nian tanba iha problema uitoan iha terenu, entaun sira sei halo fali karta ida mai Ministru, nune’e bele informa hodi hetan fali autorizasaun hodi bele kontinua tanba tuir ASH projetu sira ne’e ramata ona iha tinan 2023, entaun ha’u nia parte ne’ebé responsabiliza ba asuntu ne’e kontaktu ona ba Xefe Suku na’in rua atu aselera lalais prosesu hotu nune’e ita bele kontinua servisu hodi finaliza kampu rua ne’e. Maibé ida Soibada Manlala ne’e kampu multifunsaun hotu ona hela de’it kampu futeból mak seidauk,” nia relata.
Orsamentu ba konstrusaun kampu ualu ne’e hamutuk $209, 661.00.
Jornalista: Hortencio Sanchez
Editór : Florencio Miranda Ximenes
