DILI, 07 marsu 2024 (TATOLI)—Komisaun D trata asuntu Ekonomia no Dezenvolvimentu iha Parlamentu Nasionál (PN), kinta ne’e, halo audiénsia ho Ministru Agrikultura, Peska, Pekuária no Floresta (MAPPF), Marcos da Crus, ho ekipa hodi diskute planu lejislasaun iha tinan ne’e.
“Ohin, ami hosi Ministériu Agrikultura mai hasoru malu ho Komisaun D, tanba hetan karta hosi Komisaun atu ko’alia kona-ba lejislasaun ne’ebé ami bele aprezenta iha Parlamentu iha primeiru no segundu trimestre,” Ministru Marcos da Crus hateten ba jornalista sira hafoin halo audiénsia iha sala Komisaun D iha PN.
Lejislasaun sira-ne’ebé sei dezenvolve no tempu tuir mai sei aprezenta ba PN hodi bele diskute no hetan aprovasaun iha órgaun lejislativu ne’e mak hanesan proposta-lei liga ho adubu no mós pestísida.
Ida-ne’e inklui mós revizaun ba lei karantina nian hodi ita adapta aan sai ona membru Organizasaun Mundiál Komérsiu (OMK) hodi ita mós tenke tuir rekezitu sira-ne’ebé OMK hakarak, aleinde lejislasaun sira seluk tan relasiona ho adezaun ba ASEAN.
“Lei sira-ne’e importante tebes, tempu tuir mai sei aprezenta mai Parlamentu Nasionál,” Ministru hateten.
Nune’e, iha audiénsia ne’e nu’udar koordenasaun entre Komisaun D ho ministériu ba kalendarizasaun lejislasaun sira hodi bele trata iha tinan ne’e.
Aeinde ne’e, iha audiénsia ko’alia mós rezultadu fiskalizasaun Deputadu sira-nia iha baze iha área agrikultura oinsá hasa’e produsaun iha rai-laran liga ho produsaun hare, batar no mós haree ba irigasaun, tratór, serbisu extensionista, nune’e parte reprezentante povu sira iha PN kontinua husu ministériu atu fó atensaun oinsá hasa’e produsaun iha rai-laran.
Jornalista : Nelson de Sousa
Editór : Cancio Ximenes
