DILI, 07 marsu 2024 (TATOLI) – Ministériu Agrikultura, Pekuária, Peska no Floresta (MAPPF), sei halo rekrutamentu, iha maiu, estensionista 155 hodi apoia serbisu tékniku agríkola, liuliu fó asisténsia ba to’os-na’in sira.
Diretór Nasionál Estensaun no Formasaun Agríkola, Januário Marçal, esplika katak serbisu estensionista sira-nian atu divulga informasaun kona-ba oinsá agrikultór sira bele kuda ai-horis ho di’ak, nune’e bele fó produsaun di’ak.
Nune’e, diresaun nasionál kontinua tau importánsia hodi loke rekrutamentu, nune’e bele reforsa tan serbisu tékniku sira iha terrenu atu tulun di’ak liután agrikultór sira iha baze. “Tanba ita-nia rekursu limitadu atu reforsa serbisu tékniku ba agrikultór sira, ita presiza aumenta estensionista iha tinan ida ne’e”, Januário Marçal informa ba Tatoli iha Comoro, ohin.
Dirijente ne’e relata katak, ministériu iha estensionista hamutuk 376 ne’ebé rekruta iha 2008-2009, maibe agora hela de’it 317 mak ativu hodi hala’o serbisu tékniku, tanba balun mate ona no seluk reforma.
Haree ba falta rekursu umanu maka diresaun relata ona asuntu ne’e ba superiór sira atubele aselera prosesu rekrutamentu hodi aselera serbisu sira iha terrenu, liuliu fó apoiu tékniku ba agrikultór sira halo to’os no natar.
Ba reforsa serbisu tékniku agríkola mak diresaun tau ona orsamentu operasionál ba estensionista sira iha tinan ida ne’e ho montante rihun $260. Orsamentu ne’e, diresaun aloka tuir faze hahú husi primeiru to’o kuartu trimestre aloka rihun $65 kada.
“Osamentu operasionál ne’e sei fahe ba parte tolu. Ba estensionista sénior sira ne’ebé destaka iha munisípiu sei hetan kada fulan $100, ba estensionista iha postu administrativu $75 no estensionista agrikultór ne’ebé destaka iha suku sira kada fulan $50”, realsa.
Notísia relevante: “Presiza Aumenta Tan Estensionista”
Jornalista: Tomé Amado
Editora: Maria Auxiliadora
