DILI, 07 marsu 2024 (TATOLI) – Ministru Justisa Sergio Hornai, dehan ministériu prevé ona orsamentu ho millaun $2 hodi halo akizisaun ba mákina rua impresaun passaporte nian.
“Sim, ita iha mákina imprensaun ba passaporte ne’ebé agora daudaun iha Diresaun Jerál Servisu Rejistu Notariadu iha rua mak durante ne’e uza maibé to’o agora iha mákina ida mak avaria ona no hela ida mak funsiona. Tanba ne’e mak iha semana kotuk iha reuniaun Konsellu Ministru, ha’u halo ona aprezentasaun hodi relata problema sira-ne’e. Ho nune’e, Konsellu Ministru deside hodi halo aprovasaun hodi autoriza Ministru Justisa halo akizisaun ba mákina foun rua ba impresaun passaporte nian”, Sergio Hornai hateten ba jornalista sira iha nia kna’ar fatin Colmera, kinta ne’e.
Governante ne’e hateten, Ministériu Justisa halo ona akordu kontratu ho empreza Theles iha Singapura atu halo kompras ba mákina ba imprensaun passaporte, orsamentu sufisiente hela.
“Akizisaun ba mákina imprensaun passaporte ita sei halo iha Filándia no akizisaun ne’e sei lori tempu naruk molok to’o mai Timor-Leste, tanba ekipamentu ne’e presiza monta ho ekipamentu ne’ebé liga ba passaporte tanba ne’e presiza tempu ne’ebé naruk”, nia informa.
Nia afirma, mákina imprensaun ba passaporte, presiza tempu naruk duni tanba presiza haree didi’ak sasan sira ne’e ho kapasidade, matenek atu labele iha interupsaun iha operasionál liga ba produsaun passaporte.
“Ida-ne’e mak esforsu Governu nian, mak husu ba populasaun tomak atu pasiénsia tanba liga ba mákina imprensaun passaporte ne’e presiza duni tempu atu haree ho neneik no presiza haree didiak atu labele iha interupsaun iha operasionál liuliu liga ba produsaun passaporte”, ni konklui.
Jornalista: Natalino Costa
Editór : Zezito Silva
