DILI, 07 marsu 2024 (TATOLI)—Ministériu Solidaridade Sosiál no Inkluzasaun (MSSI) liuhosi Institutu Nasionál Seguransa Sosiál (INSS) sei halo lansamentu ba pagamentu pensaun sosiál iha Rejiaun Administrativa Espesiál Oé-Cusse Ambeno (RAEOA).
“Ami planu ona iha tempu badak sei halo lansamentu pensaun sosiál ba idozu no invalidéz iha RAEOA, maibé data fiku atu halo pagamentu semana oin mak sei fó sai,” Ministra Solidaridade Sosiál no Inkluzasaun, Verónica das Dores, hateten iha salaun MSSI, Caicoli, segunda ne’e.
INSS halo pagamentu ba benefisiáriu programa ho maneira rua, liuhosi Automated Teller Machine (ATM) P24 bele simu kada fulan no sira ne’ebé hela iha área rurál seidauk iha konta bankária no ATM simu kada fulan-tolu iha tinan-ida.
Antes ne’e, Prezidente INSS, Arlindo Pinto, hateten, parte institutu manda ona dadus benefisiáriu programa pensaun sosiál hamutuk 120.000 ba Banku Nasionál Komérsiu Timor-Leste (BNCTL, sigla portugés) hodi sira halo verifikasaun.
“Benefisiáriu idozu no invalidés ne’ebé sei hetan pagamentu iha tinan ne’e hamutuk 120.000 ho nia orsamentu hamutuk $86.023.178,” nia dehan.
Pensaun sosiál invalidéz hahú bolu eskalaun úniku idade 18-59 hamutuk 10.000 ho nia orsamentu hamutuk $7.200.000 kada fulan simu $60, enkuantu dadus provizóriu ba idozu sira ne’ebé mate ona tinan kotuk no tinan ne’e BNCTL kansela pagamentu hamutuk 200 resin (dadus provizóriu) hodi la fó pensaun sosiál.
Iha loron 01 marsu 2024, Prezidente Komisaun Ezekutiva BNCTL, António Francisco Vitor, hasoru malu ho Vise Primeiru-Ministru Mariano Assanami Sabino, hodi informa katak Banku atribui ona kartaun ATM P24 ba idozu no invalidéz hamutuk rihun 15 resin.
Jornalista : Arminda Fonseca
Editora : Julia Chatarina
