OMS disponibiliza fasilidade ba MS hodi apoiu ba ospitál neen iha Timor-Leste
DILI, 07 marsu 2024 (TATOLI) – Organizasaun Mundiál Saúde iha Timor-Leste (OMS), entrega fasilidade nutrisaun nian no ekipamentu sira seluk ba Ministériu Saúde (MS) hodi apoiu ba Hospitál Nasionál Guido Valadares (HNGV), Hospitál referál no Hospitál Rejionál sira iha munisípiu.
“Ekipamentu sira-ne’e mak hanesan, dasi ba labarik, metru hodi sukat liman kabun, mákina ba blender nian no mós ekipamentu sira seluk”, nia relata.
Nia afirma, OMS, ohin, entrega ekipamentu barak los hanesan, dasi ba labarik, metru hodi sukat liman kabun, mákina ba blender nian no mós ekipamentu sira seluk.
“Atividade hand over ba ekipamentu nutrisaun nian ne’e ita atu apoiu ba Hospitál Nasionál Guido Valadres (HNGV), Hospitál Rejionál rua mak Oe-Cusse no Baucau, Hospitál Referál Maubessi, Maliana no Suai”, Vise Ministru Saúde ba Fortalesimentu Institusionál Saúde, Jose Magno, ba jornalista sira iha salaun Palásiu Sinzas Caicoli, ohin.
Nia informa, iha fasilidade hirak ne’e, ba bebé sira ne’ebé foin moris to’o fulan neen no oinsá atu distribui ne’e husi Diresaun Jerál Kuidadu Saúde Primaria no Diresaun Nasionál Nutrisaun mak sei prepara ba ida-ne’e.
“Kona-ba distribuisaun ne’e orsida Diresaun Jerál Kuidadu Saúde Primaria no Diresaun Nasionál Nutrisaun sira prepara no rejistu hotu mak foin halo distribuisaun ba ospitál sira. Depois sei lansa ninia utilizasaun ba ospitál sira atu ita-nia pesoál saúde sira bele hahú kedas ona ho demostrasaun ba utilizasaun sira, atu nune’e ita-nia inan sira bele partisipa iha programa ne’e ho di’ak liu”, nia hateten.
Iha fatin hanesan, Reprezentante Organizasaun Mundiál Saúde iha Timor -Leste (OMS), Arvind Mathur, informa servisu ne’ebé mak halo atu rezolve problema má nutrisaun mak presiza hadia fasilidade saúde iha komunidade sira hodi enkoraja inan sira tenke fó susubeen esklusivu ba oan sira bainhira moris mai.
“Ita haree katak, ita nafatin enkoraja fó susubeen inan nian ba oan sira iha fasilidade saúde hothotu, bainhira bebé moris mai ida-ne’e mak objetivu ita hakarak fó suporta hodi nunee haforsa tan servisu ba área nutrisaun nian iha TL”, Arvind Mathur informa.
OMS iha Timor-Leste kontinua kolabora ho Ministériu Saúde hodi hametin intervensaun hirak-ne’e. Estratejia ida-ne’ebé kustu-efetivu liu atu prevene má nutrisaun hothotu mak promosaun ba prátika fó susubeen inan ne’ebé di’ak liu, inklui inisiasaun sedu fó-susu eskluzivu durante fulan neen no kontinua fó-susu ba tinan rua no liu.
OMS kontente tebes tanba dekretu-lei kona-ba regulamentu merkadoria susubeen-inan nian ne’ebé foin lalais Timor-Leste promulga ona. Polítika ida-ne’e ho objetivu atu hadi’a promosaun intervensaun fó-susu-been inan iha nasaun laran tomak.
Importante mós atu asegura katak fasilidade saúde sira-ne’e iha ekipamentu di’ak atu fó apoiu ba bebé nia inan sira atu adopta hahalok ne’ebé rekomenda hodi fó susubeen inan atu prevene má nutrisaun.
Intervensaun xavi seluk tan ne’ebé bele salva moris ba labarik sira maka fó kuidadu saúde ne’ebé ho kualidade ba labarik sira ne’ebé iha má nutrisaun grave. Atu hadi’a kualidade kuidadu iha unidade jestaun nian iha nasaun laran tomak, OMS kolabora besik ho Diresaun Nutrisaun iha MS hodi kria pakote formasaun padraun ida ba tratamentu ba labarik sira ne’ebé hetan má nutrisaun grave.
Jornalista : Felicidade Ximenes
Editór : Zezito Silva
