BNCTL Viqueque introdús kréditu fiar ba feto sira iha Lacluta
VIQUEQUE, 08 marsu 2024 (TATOLI)- Banku Nasionál Komérsiu Timor Leste (BNCTL-portugés) munisípiu Viqueque, sesta ne’e, introdús programa kréditu fiar ba feto sira iha área rurál liuliu iha postu Lacluta, hodi asesu ba hala’o atividade negósiu.
Xefe Sukursál BNCTL, Natalicio M. de Jesus, espresa BNCTL iha ninia produtu ida ne’ebé foin lalais lansa ona tanba ne’e introdús ba feto rurál sira hodi asesu kréditu fiar hodi hala’o atividade negosiu iha área rurál.
“Ohin, ami introdús produtu BNCTL nian kona-ba kréditu fiar ba ita-nia inan feto sira iha área rurál ne’ebé interese asesu atubele kria negósiu ruma. Tanba kréditu fiar ne’e mós fó perioridade liu ba ita-nia feto rurál hodi sira bele hala’o sira-nia negósiu”, Xefe Sukursál BNCTL munisípiu Viqueque, Natalicio M. de Jesus,hatete ba Agência TATOLI,I.P, iha salaun parókia Santo António Lacluta, ohin.
Nia fó hanoin ba feto rurál sira katak ho kréditu fiar ne’e atu reforsa negósiu sira hanesan individu, grupu, Kooperativa no seluk tán. “Kréditu fiar ne’e espesiál ba ita-nia inan feton sira-ne’ebé hela iha área rurál. Atu hetan kréditu fiar hosi BNCTL ne’ebé ho juru 6% kada tinan no bele rai osan hodi hetan benefísiu apropriadu”.
Vizaun ba kréditu fiar atu empodera feto iha área rurál liuhusi negósiu hodi promove kultura rai osan sein husi sira-nia hela fatin ne’ebé ho produtivu no ekonómia.
Ho nia misaun maka atu fó servisu bankaria ne’ebé apropriadu no kondisaun ne’ebé favoravel ba feto iha área rurál sira hodi hadi’a moris ba indenpendenti kontribui ba dezenvolvimentu ekonómia.
“Kona-ba vantajén husi kréditu fiar maka hakbi’it no haboot atividade negósiu tanba ita dala ruma halo negósiu ho sasán ne’ebé oituan. Depois ita asesu ba kréditu ita bele hasa’e kuantidade negósiu ne’ebé boot. Nune’e ita bele responde ba ita-nia nesesidade iha postu Lacluta”, nia enkoraja feto rurál.
Kréditu fiar ne’e sei oferese va inan feto sira ne’ebé halo atividade iha área agrikultura hanesan ortikultura, peska, pekuaria, turizmu komunitária, prosesamentu hahan no indústria .
“Depois lansa kréditu fiar to’o agora feto Viqueque sira seidauk ba halo kréditu. Tan ne’e, ami introdús ba sira atu komprende hodi iha interese ba asesu iha BNCTL”, katak.
Kréditu fiar ne’e plafon masimu montante $25.000.00 no kustu administrasaun 1%. Kritériu maka hanesan foto kopia kartaun eleitorál, Billete Identidade (BI), Passaporte, foto kloridu 3×4, karta rekomendasaun xefe suku no husi grupu. Asesu kréditu ne’e tenke feto área rurál ho idade 17 to’o idade 55.
Jornalista : Vitorino Lopes da Costa
Editór : Florencio Miranda Ximenes
