iklan

HEADLINE, SOSIEDADE SIVĺL

FONGTIL serbisu tau-matan ba funsionamentu governasaun no polítika públika

FONGTIL serbisu tau-matan ba funsionamentu governasaun no polítika públika

Prezidente Konsellu Fiskál FONGTIL, Inocêncio de Jesus Xavier. Imajen/Osoria Marques

DILI, 08 marsu 2024 (TATOLI)—Prezidente Konsellu Fiskál FONGTIL, Inocêncio de Jesus Xavier, hateten, FONGTIL nia servisu hodi tau-matan ba funsionamentu Governasaun sira no oinsá   halo polítika públika Estadu ida hodi hatan ba nesesidade povu iha Timor-Leste.

“Ami halo asembleia ida ne’e hanesan halo reflesaun ba FONGTIL ida uluk, agora no ba futuru, entaun ita hateke FONGTIL ida uluk harii iha 1998 nia faze luta ida ba konsolidasaun ba indepedénsia luta kontra ho servisu sosiál sira FONGTIL aposta iha umanidade oinsá atu halo servisu polítiku ba independénsia. Oras ne’e daudaun ita restaura indepedénsia  FONGTIL hola papél  nafatin hanesan sosiedade sívil  ne’ebé mak agrupa organizasaun oioin  nia servisu iha setór hothotu  hodi taumatan ba funsionamentu Governasaun nian oinsá atu  iha polítika públika  Estadu nian  bele hatan  duni ba nesesidade povu nian,” Inocêncio  de Jesus Xavier, hateten ba TATOLI, iha ámbitu asembleia jerál anuál 2023  ho tema  reflesaun  ba ezisténsia  FONGTIL uluk, ohin no ba futuru, iha salaun Canossa Has-laran, Manleuana, ohin.

Tuir Inocêncio informa, “Ita ko’alia kona-ba saúde, edukasaun, infraestutura bázika, bee no saneamentu asesu ba justisa   ekonomia, seguransa no defeza, agrikultura no setór importante sira seluk ne’ebé mak tama iha mandatu FONGTIL nian hodi haree ba ida ne’e karik iha problema ruma oinsá Governu ka Estadu atu rezolve”.

Nia esplika, FONGTIL agora daudaun halo hela servisu oinsá halo parseria ho Governu liuhusi auditória sosiál no servisu apoiu sosiedade sívil ne’ebé agora aposta iha boa governasaun no kapasitasaun, edukasaun sidadania, empoderamentu ekonomia, igualdade jéneru.

“Ida ne’e mak papél importante atu refleta fali FONGTIL ida uluk   ne’e oinsá  no ba futuru  FONGTIL atu halo saida, tanba ne’e mak  kada tinan nu’udar kultura tuir  estatutu FONGTIL nian ejize konsellu  no ezekutivu atu aprezenta relatóriu progresu tinan ida nian ba  membru sira, tanba konsellu hetan mandatu husi  asembleia husi NGO  nasionál, internasionál no lokál sira ne’ebé liuhusi asembleia anuál ne’ebé  atribui kompeténsia no aprovasaun ba programa prioridade sira ba sekretariadu oinsá  atu bele fornese  iha  mandatu haat ne’ebé ami iha mak koordenasaun, diseminasaun informasaun, kapasitasaun  no advokasia,” nia afirma.

Nia informa, Problema kada tina ne’e mak durante ne’e Governu la tau osan boot ba iha asuntu bee no saneamentu entaun problema ida ne’e mak FONGTIL define iha asembleia tau sekretariadu atu simu mandatu hodi organiza no fasilita ba membru sira tuir mandatu ne’ebé mak ko’alia iha estatutu.

“Problema bee kada tinan Governu la tau osan-boot ba iha ne’ebá ida ne’e hatudu katak povu sei nafatin enfrenta situasaun bee, nune’e mós problema iha El-nino ne’ebé NGO barak servisu ba iha mitigasaun justisa klimátika ne’ebé mak iha buat barak iha ne’ebá. Entaun, ami tenke define iha asembleia, tau sekretariadu atu nia simu mandatu hodi organiza no fasilita ba membru sira tuir mandatu ne’ebé mak ko’alia iha estatutu,” nia haktuir.

Nia dehan, FONGTIL halo reflesaun atu hateke ba an katak problema ne’ebé mak durante halo kobrementu liuhusi auditóriu sosiál husi membru sira hatudu katak iha problema barak Governu tenke hadi’a no halo mellória.

“Ami halo reflesaun ami hakarak hateke ba ami-nia an entaun ita iha imparsialidade iha asaun nune’e problema ne’ebé mak durante ami-nia kobrementu liuhusi auditóriu sosiál husi membru sira hatudu katak iha problema barak Governu tenke hadi’a,” nia relata.

Nia mós husu atu rezolve problema balun sira ne’ebé iha mak ba oin tenke servisu hamutuk hodi lori moris di’ak ba povu no mós labele iha diskriminasuan no partidariza apoiu sira.

“Ita dezeja iha IX Governu konstituisionál ho lideransa nu’udar istóriku, patrimóniu Estadu nian ne’ebé nia halo ezersísiu di’ak atu kontrola nia membru Governu sira atu halo programa no polítika ne’ebé diak ba povu iha futuru mai,” nia hato’o.

Asembleia jerál ba membru 270

FONGTIL realiza asembleia jerál anuál 2023 ba membru ONG hamutuk 270 hodi halo reflesaun ba ezisténsia.

Prezidente Konsellu Fiskál FONGTIL, Inocêncio de Jesus Xavier, relata, FONGTIL eziste besik tinan 30 ona. Iha tempu okupasaun Indonézia iha organizasaun 15 mak funda FONGTIL no ohin iha 2024 FONGTIL rejista membru permantente sira hamutuk 270 no agora membru sira ne’ebé aprova tan 28 no hamutuk 300-resin sai membru efetivu ba FONGTIL nian.

“Iha matadalan haat FONGTIL nian, ita ko’alia kona-ba kapasitasaun, koordenasaun, diseminasaun no advokasia,” nia esplika.

Inocêncio de Jesus Xavier informa, FONGTIL iha relasaun bilaterál no multilateral, iha rejiaun sudezte aziátiku, iha Komunidade nasaun ho lian ofisiál portugés (CPLP, sigla portugés) no sosiedade sívil sira oinsá atu servisu hamutuk ba pás no estabilidade.

Iha fatin hanesan, Koordenadór Asuntu Sosiedade Sívil iha Gabinete Vise-primeiru Ministru no Diretór Servisu Apoiu Sosiedade Sívil no Auditória Sosiál, Joaquim da Costa Freitas, dehan, sira fó deit apoiu morál no apoiu tékniku no finansiamentu balun atu nune’e asembleia ida ne’e bele progresu no bele mós hasai rezolusaun sira ne’ebé mak kontribui ba dezenvolvimentu organizasaun sosiedade sívil rasik.

Nune’e mós kontribui ba dezenvolvimentu nasionál no bele sai parseiru di’ak ba Governu hodi ativu liu iha prosesu dezenvolvimentu iha rai ida-ne’e.

 

Jornalista : Felicidade Ximenes

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!