DILI, 08 marsu 2024 (TATOLI) – Ministériu Agrikultura, Pekuária, Peska no Floresta (MAPPF) prevee rihun $25-resin atu konstrui postu revista entrada ida iha Casnafar, nune’e bele halo vijilánsia ba komunidade ne’ebé hatama ai mai Dili.
Konstrusaun postu ne’e planeadu ona iha jullu tinan ne’e no nia planta no kadernu enkargu (BoQ) preparadu ona, maibé iha problema maka fatin ne’ebé identifikadu atu harii postu ne’e besik loos konstrusaun ponte, entaun diresaun sei buka fali espasu seluk iha área Cansnafar nian.
“Tanba ne’e, ekipa sira sei halo hela aprosimasaun ho autoridade sira iha área Casnafar hodi bele hetan fali fatin foun atu realiza konstrusaun ne’e”, Diretór-Jerál Floresta, Káfe no Planta Industriál, Raimundo Mau, informa iha Comoro, ohin.
Proposta konstrusaun ba postu ne’e aprezenta ona ba superiór sira no dirijente ne’e espera katak ekipa negosiasaun iha terrenu bele hetan rezultadu hodi bele realiza konstrusaun iha tinan ida ne’e.
“Ita-nian planu konstrusaun ne’e sei realiza iha jullu molok tinan ne’e remata, tanba ne’e buat hotu la’o di’ak ona, prosesu aprovizionamentu mós bele aselera hodi hahú ona konkursu públiku”, dehan.
Planu estabelese postu revista iha pontu entrada Canafar ne’e atu sirkulasaun produtu florestál ne’ebé tama Dili ne’e tenke ho legalmente atu garante sustentabilidade rekursu ai-laran sira ne’ebé komunidade sira foti ho responsabilidade maibé bele kontribu taxa ba Estadu.
Postu revista ne’e sei halo ho medida 8×12 ho kuartu ida, dapur no hariis-fatin, inklui varanda atubele fasilita kontrola ekipa floresta sira-nian ho adekuada. “Bainhira harii ona postu ida tan iha Casnafar, Diresaun Floresta rasik bele iha ona postu vizilánsia hamutuk haat, tanba agora foin maka iha tolu iha Tíbar, Akanunu no Loes”, informa.
Jornalista: Tomé Amado
Editora: Maria Auxiliadora
