BAUCAU, 09 marsu 2024 (TATOLI) – Autoridade Admistrasaun Munisipál liuhosi Prezidente Autoridade Munisipál Baucau enkoraja ba feto Timor espesialmente feto Baucau oan atu kontinua luta ba moris di’ak.
Prezidente Autoridade Munisipál Baucau, Veneranda Eurico Marques Lemos Martins, hato’o parabéns ba feto Timor ne’ebé ohin festeza ba loron mundiál feto tanba feto sai nu’udar inan, edukadora, lutadora no lori malu ba pozisaun altu iha nasaun.
“Mensajen ba feto maluk iha Baucau atu kontinua luta nafatin, kontinua sai nafatin feto forte hanesan inan, lutadora ba família no sosiedade,” Prezidente Autoridade Munisipál Baucau hateten iha Vila Nova, sesta ne’e.
Eis deputada ne’e, argumenta, feto Timor tenke banati tuir eroiña sira-ne’ebé mate ona ba luta ukun aan tanba sai ezemplu di’ak atu feto maluk sira kontinua luta ba moris di’ak feto maluk hotu nian.
Hanesan líder feto ne’ebé lidera munisípiu Baucau fó motivasaun ba feto Baucau oan atu liuhosi loron mundiál feto bele sai inspirasaun hodi forsa hasoru situasaun hotu liuliu sira-ne’ebé envolve aan iha sosiedade sivíl, funsionáriu publiku no profesora inklui pesoál saúde sira.
“Ita kontinua luta ba moris di’ak feto iha Baucau,” Veneranda Lemos hakotu.
Jornalista : Natalino Belo
Editór : Evaristo Soares Martins
